【爆料王】iPhone6s放假機泛濫 疑集團式經營
今次iPhone 6s，係歷代iPhone中最搵唔到錢一部，首日開賣已經試過跌穿「招股價」！
不過「有心人」！馬上想到另一種搵錢方法，就係用樣辦機，甚至咖哩飯放盒中，當真機在先達放售，以詐騙手法謀利；是第一次發生嗎？當然不是！每代iPhone都有類似事件，不過今次iPhone 6s情況係最泛濫一次！
同先達舖Sales吹水，佢哋話大概半個月前開始，基本個個星期都有一、兩單類似事件；而在近一星期，差不多去到隔日或日日一單！
以往先達行規，有所謂「假一、賠一」的不成文法，意思是如果你放一部假機，就要賠一部真機的價錢，例如你放售10部128GB iPhone 6s Plus（$8,088），那麼你就要賠償$80,880，否則就要報警處理！老實說，這種手法絕對帶着點點江湖味道，而且在送警之前，會發生甚麼事？據稱好多人都會無故「跌親撞傷」，當中原委，相當耐人尋味。
但可能就是這個「假一、賠一」的不成文法，助長了放假機這股歪風，話說近期的放假iPhone人士，好似都已經摸熟了這個套路，所以好多時放假機時，都會在身上袋上同手機相等價值的現金，只要一經撞破，就諗住賠錢了事，玩法就好似買大細及鐵索一樣，今舖賭2部、下次放4部……
有人成功「盜壘」嗎？答案是有的，近兩星期，先達有不少舖頭都矇受假機損失，據稱更有舖頭一次過入了十部、八部。
在剛過的周四晚，有蘋果記者就撞見一次「懷疑放假機事件」的發生，今次最大不同處，就是再沒有「假一、賠一」的不成文法了，店主立馬報警處理！可能先達的店東們，都已經發現了此風不可長，據稱好多店舖，亦打算今後以相同手法處理。
行外人未必知，無錯！一般未開封的iPhone機價會較高，所以好多騙徒以此為漏洞，先放樣辦機在「真iPhone」機盒內，再用熱縮膠包封，企圖矇混過關；不過好認真同大家講，在先達打滾的Sales們，每日過手的iPhone，可能仲多個你咁多年用過的手機，所以一經上手，單就重量都已經可以分辨真假；而外行人亦未必知，其實Apple封iPhone的熱縮膠，無論在物料或手法上，都非常獨特，內行人看上一眼，基本真假立辨！
說了哪麼多，只為說先達的Sales們很勁嗎？錯了！以往入到假機的舖頭，大多是老店員不在，而由新手Sales收機，不過經近月來的事件，在任何情況下，都只會由老手收機！
另外，大家可能不知，其實這類放假機事件，非常「集團式」經營，基本每次被人踢爆後，好多時都會有所謂的「大佬級」人物，出來作善後；負責放機的人，多是生面口的後生仔，好多明顯見到是入世未深的，所以令人非常懷疑，這些放機的人，可能是被人所利用。
文：星爺
I
没有评论:
发表评论