【電腦巡場】智能手機互傳資料 極細WiFi手指
驟看機身外形，與一般USB手指差不多大小，機身尺寸為20.83 x 78.21 x 12.19mm，重量21.76g。
有冇用開OTG手指？用過的真係返唔到轉頭，抄資料、抄相、交換資料，一邊是microUSB專插手機，另一邊是USB 2.0或USB 3.0大頭，又可以對應電腦，真係非常方便。
不過世事無絕對，嚟緊好快又有改朝換代的問題！事關今年旗艦級Android手機專享的Snapdragon 820，除咗畀到你高速的新體驗外，更對應傳輸及叉電速度更快的USB Type-C插頭，每次一轉插頭位，又要買轉換頭、又要買過隻新款色OTG手指，咁咪好煩？
SanDisk最近新返了一款Wireless Stick，簡單講佢只會留低最普通的USB 2.0大頭設計，至於連接手機或其他智能裝置方面，佢就改行了WiFi設計，所以需要互換資料時，可以作隔空傳送，唔需要受不同插頭的形式所規限。而且機身還內置有儲電池，每次叉滿電後可以使用4.5小時，而每當你插上USB傳輸資料時，又會為機身自動叉電，操作上叫幾簡便。
由於傳輸資料使用了WiFi制式，所以基本Android及iOS手機雙對應，不過使用前要先安裝專用app，操作介面亦尚算簡易。不過價錢方面，就會比一般OTG手指為高，始終是對應雙系統，而且硬件及軟件技術上，都遠較一般OTG手指為高，16GB（$195）、32GB（$295）、64GB（$395）及200GB（$950），驟看64GB好似相對較實用，200GB冇錯是性價比較高，但上200GB的抄寫內容，不是太多人有實際需要吧！
查詢：展昇（深水埗黃金商場地面42至44號舖）
記者、攝影：朱崇德
上一則: 【網上爆post】Apple工程師回信 關閉App無助省電
下一則: 【科健籽】汗流不止關你肺事？
I
没有评论:
发表评论