2016年4月2日星期六

【職場哀歌】變態同事四大特徵　你隔籬位中幾多個？

十個打工仔，九個返工都曾經遇過變態同事，究竟變態同事具備咗乜嘢特徵？加拿大兩大零售組織的前高層Andrew Faas就歸納咗幾項同大家分享吓。

第一：有恐嚇傾向，呢種人喺工作上激勵他人嘅方式係一味靠嚇，唔識尊重同事，喺工作方面亦都潛藏住「有破壞冇建設」嘅傾向。

第二：鍾意講大話到有病態傾向，而且去到一個講完大話都完全唔怕被揭發嘅地步，因為佢地可以再講更多嘅大話，去掩飾之前講落嘅一堆大話。

第三：貪功攞威，成日訂埋哂啲不可能嘅目標要求同事去做，明明個目標勁唔合理都話合理，不過事實係就算佢哋自己，都一樣冇能力去達到同一個目標。

第四：冇同情心，話之你死。無論佢地做咗啲乜嘢影響到人，都總會有辦法搵到藉口去將自己嘅行為合理化，毫無內疚之心。

至於變態同事其他特徵，仲包括極度自我中心、唔理世俗規則，同埋勁古惑有乜唔妥就即閃人。