都唔「嗅」米氣嘅 - 林夕
有一批諺語口頭禪，一講就會出賣了你的年齡。世界上或許真有什麼事情，值得隱瞞，讓自己活得不夠磊落，但年齡不值得。出賣？給損友出賣就怕。口頭禪？
有次，我脫口而出，罵損友你都「冇興」嘅，損友笑我，而家冇人講「冇興」㗎啦，我澄清，我都係聽我老豆講得多至講，之不過他會鬧人「冇X興」，那個X應該是當副詞用。我又問，其實「冇興」個「興」，是否潮流「興唔興」個「興」，一個人冇跟上潮流有乜咁大罪，究竟點解？損友話，跟唔上時代又要指指點點，阻住個地球轉咪大罪囉，咁都要解，都唔「嗅」米氣嘅。
又來一句，究竟係唔「嗅」米氣定唔「湊」米氣，「湊合」個湊。聞唔到米氣，我知點解，等同今日的離地，但又有不吃人間煙火、不懂人情世故、不知世界艱難、不切實際等等等等。
口頭禪沾滿時代那陣「除」，今人不一定餐餐要食米，我對上一代卻明明吃得很飽，也不能缺一碗飯，冇米氣就冇力氣云云。
上一「脫」人愛講的，為捍衛香港風俗，今日再無需避諱，更應該發揚光大。
只有一句我講唔出口，「我食鹽多過你食米」，又係離唔開食同米。
食鹽多過人食米，唔單止冇乜巴閉，仲會死快啲，活了一把年紀，跟人家較勁，沒道理可講，也沒什麼可恃，唯有以「我比你更快接近七老八十」壓人，實乃可悲，又追唔上健康潮流，真係「冇興」 。
要倚老賣老，也有人用另一句過時的，心態也一樣霸道的：「我做緊XX嗰陣，你仲着緊開浪褲」。
呢句正，着「開浪褲」，好似係細路仔專利，除非唔係，不過，今日好似真係唔係，好多大人都好似鍾意着開浪褲，專家話唔會焗親下面個親人。看不起着開浪褲的小弟弟，同樣跟養生資訊脫節，又一個唔死都冇用。你做緊XX嗰陣，人地仲做緊乜，又關你乜事？關鍵是，你現在又做緊啲乜，你所做的，別人不一定要跟着做，世界之所以會進步，是容許別人走少人走的路，後人走你沒走過的路。你行橋多過人行路，話唔埋係你專揀捷徑而已。
若有所謂世代之爭，着開浪褲的細路大可還拖：你沈迷緊着丁字褲的時候，我考證過，鬥古老，開浪褲最古老叫「開襠褲」，褲襠之謂也，我開檔考緊古嗰陣，你淨係識得玩褲浪，都唔嗅米氣嘅。
上一則: 百貨夕陽 - 左丁山
下一則: 一字一字招北京的魂 - 李碧華
Z88
没有评论:
发表评论