我和爸爸捉精靈 - 曾志豪
老爸劍俠生日，我們也順老人家意思，低調簡單，就在家中自己煮飯仔，最緊要齊齊整整，其實最緊要可以弄孫為樂。所以我心安理得沒有買禮物，因為曾小B便是長輩最好的禮物。
酒過三巡，劍俠突然拿起平板電腦，神神秘秘的問我：「捉嘢嗰個遊戲係點玩㗎？你示範俾我睇吖。」
甚麼？連老竇都知道這款「捉嘢嗰個遊戲」？這真是全城效應，無可抵抗。
我不知道如何向一個長者解釋Augmented Reality，簡稱「AR擴增實境技術」，更無法要他明白「寵物小精靈」的前世今生。我只能說，老竇呢隻game要出街先玩到。
他若有所思，開始研究遊戲會出現的每一個圖案符號。我於心何忍，毅然帶阿爸上街實戰捉精靈。
一行2人以及一隻狗，月黑風高捉寵物夜。
我打開遊戲說：「老竇，我哋喺幅大地圖上，向前行便會去到甚麼婦女會的地方。」老竇居然一眼認得「補給站」的正確位置：「呢度咪係屋企樓下囉。」
我們2仔爺互補長短，我手腳靈活，負責扔精靈球，老爸是社區地膽，負責帶路找補給站。我的小狗是導盲犬，帶領2個低頭族找精靈的傻人避開燈柱。
老爸玩得很投入，甚至主動要求扔精靈球，而他居然扔得比我更有準頭！
我們按圖索驥，看到附近有人放櫻花吸引精靈，竟然繞路趁墟。原本半小時的放狗行程足足玩了一小時。沿途看見許多小智奮戰，他們看到有個頭髮花白的伯伯捉精靈，不知作何感想？要改名做老智嗎？
一隻蝙蝠出現，我心血來潮，叫老爸走入鏡頭，一個80歲的長者和一隻cp15蝙蝠組成完美合照。這應該便是世代和諧共融。
上一則: 國術代表 - 尊子
下一則: 渾 水 - 李碧華
Z88
没有评论:
发表评论