脫歐冇運行 - 左丁山
英國公投決定脫歐，睇世界事後反應，震驚居多，金融市場亂成一團，呢次啲市場聰明人估計錯誤，以為英國人到最後會講金不講心，一定會反對脫歐，卒之錯晒，英國有兩大類人唔講錢嘅，一類係上咗岸唔憂米嘅老人家，享受長俸嘅退休人士，有米鄉紳，第二大類係have nots（窮），橫掂都係冇咯，金馬倫歐思邦仲搵錢嚇佢地，作用全無啦。大把人唔係牛津劍橋人（呢兩個地方力挺留歐），點識睇保守黨嘅留歐宣傳（以大量經濟數字為主）呀？脫歐派就簡簡單單，反來覆去英國要重新獨立，不聽命於歐洲官僚，僅係中學畢業嘅人（呢批人多數贊成脫歐）都聽得明。
左丁山及好多朋友識得之居英香港人，個個反對脫歐，佢地輸咗公投之後，為之愁眉苦臉，為子女前途擔憂。唉，唔憂得咁多嘅咯，英國脫歐已成事實，居英港人唯有適應環境，努力工作，唔通移民去德國法國咩，邊度都係一樣，返嚟香港又買唔到樓嘅啫，何況佢地嘅仔女唔多識中文，返到嚟更難搵工。
英國「重新獨立」是否可以重振昔日聯合王國聲威？無人敢批死話唔得，講概率就梗係幾低啦，英國人工業競爭力低於德國，時裝優閒產品創意低於法國意大利，科技產品電腦互聯網水平低於美國芬蘭，銀行業剩番一間匯豐係世界級，基金資產管理已全部美國化，搬晒去都柏林便可無縫交接，諗到最尾，英國只有倫敦與英超係世界上獨一無二嘅寶貴資產，脫歐後連呢兩粒明珠都蒙上陰霾。或者咁啦，英鎊跌到35年低位之後，就會有大量強國人、亞洲人湧往倫敦血拼，打救當地零售業！
英國政治經濟脫歐，估唔到連足球都冇法子留歐。英格蘭在歐洲國家盃對冰島之前，公子L就話：「睇嚟英國國運向下，講唔定會輸埋俾冰島，有無人敢下注冰島贏？」左丁山睇得足球多，認為左計右計，英格蘭冇可能輸波嘅啫，勸大家唔好睇得咁淡。到星期二早上，死嘞，俾人聲討，話左丁山呢個足球親英派得把口！自己目前冇訂651台，睇唔到場波，上BBC足球網頁瀏覽，嘩，啲評論員與一眾名宿鬧領隊鶴臣及球員，完全冇面俾，舒亞拿指全隊hopeless！連尼加斯指球員技術差，領隊戰術烏垂垂。朗尼唔知羞，仲話已經盡力，以後仍然願意為國效力，其實講真，朗尼已係負資產，新領隊如仍然選朗尼，英格蘭永遠奪標無望。講得玄啲，英國脫歐，國運不堪，足球員都發瘟呀！
上一則: 口水和火焰 - 陶傑
下一則: 如何成功侮辱自己？ - 林夕
I
没有评论:
发表评论