英國再有女首相 - 左丁山
英國保守黨選黨魁，經兩輪投票，第一輪就淘汰咗Crabb與Fox，二人改為支持文翠珊（Theresa May），第二輪投票在七月七日舉行，三人之中，文翠珊得199票，李德森（Andrea Leadsom）得84票，高文浩（Michael Gove）得46票，於是根據保守黨國會議員選舉黨魁規例，前二名進入九月九日之決選，高文浩出局，呢位先生首先背叛老友記金馬倫（佢係金馬倫已故兒子嘅教父），改投脫歐派陣營，脫歐派贏咗公投之後，高文浩又背叛約翰遜，自己企出嚟參選，逼走約翰遜。但咁冇信用之人，點樣會得到保守黨議員大力支持呀，奸有奸輸，有其道理。
文翠珊領先李德森咁多票，是否在保守黨黨員一人一票選舉之下，必然勝利？咁又未必，原來有資格投票嘅黨員接近125,000人，呢班人據民意調查專家研究過，有幾項特徵：（一）多數係白人男性，（二）年紀在五十歲或以上，（三）絕大部份係中產階級。咦，對文翠珊係壞消息噃：因為今次脫歐公投之時，具備上述特徵嘅英國選民，多數投脫歐一票，而文翠珊係「留派」，李德森係脫派，故此文翠珊係有機會贏，但未必穩陣。
無論邊位贏，英國註定有歷史上第二位唐寧街十號女主人，與戴卓爾夫人齊名，如果李德森贏，更創下多一件歷史，就係第一位非牛津女首相。自邱吉爾之後，六十餘年來歷任英國首相皆出身牛津大學，只有兩位例外，第一位係中學畢業生、渣打銀行文員出身嘅馬卓安，第二位係工黨白高敦（愛丁堡大學），李德森生於1963年，係陶傑校友師妹，在華威大學畢業，主修政治，幼時靠單親媽媽撫養長大，住在冇廁所嘅排屋（terraced house），同金馬倫呢類Eton牛津少爺仔相差甚遠，畢業後做交易所出市交易員，後來入巴克萊銀行做賓架，於保守黨內被視為行政經驗缺乏嘅初級內閣大臣，如果由佢做首相，當然係爆冷門，但對寒門子弟絕對有勵志作用。相反，文翠珊係英國傳統中產階級出身，在牛津攻讀地理，後入英倫銀行，由頭到尾係內閣大臣材料，佢仲患上嚴重糖尿病（Type 1），每日打四支胰島素針，普通人在60歲年紀可能會因病退休，但佢仍然為做首相而拚搏，可知女強人是特別構造的。
（按：交稿後李德森突然宣布退出競選。文翠珊在星期三入主唐寧街十號成為英國第二位女首相。）
上一則: 南中國海正能量 - 陶傑
下一則: 誰亦滿身傷勢 - 曾志豪
I
没有评论:
发表评论