股市突變 - 左丁山
美聯社圖片
九月二日與一班朋友談論股市，當時股市走勢良好，市場消息盛傳北水南下，深股通即將開動，有利港股市場。一位退休投資銀行家指股市還可上升，但個別股份宜獲利回吐，賺錢袋咗先。閒談完畢，大市已收市，於是暫定九月五日的一個星期趁高出貨，誰知道大市愈升愈有。左丁山一於按兵不動，大市一路上升，至九月九日星期五午飯時曾最高升了444點，各報刊登內地保險資金（險資）大舉南下買股，又有剛自北京回港的朋友來電：「在北京聽到不少大戶來港炒股的消息，香港應該還有得炒！」
咁嘅情況，點捨得出貨呀，但見到九月九日港市大量股票獲利回吐，升幅降至181點，收市報24099，心諗人人爭住「食糊先」，九月十二日星期一，點都要趁高出番啲咯。
哎吔，點知當晚美國就食咗瀉藥，標普五百下跌2.45%、道指跌2.13%、納指跌2.54%，心知不妙，香港股市冇運行咯，呢勻執輸行頭，不及時獲利回吐止賺，慘過敗家，今個星期一港股慘跌809點，收報23290，半個月升幅，一日冇晒。星期二再由升轉跌，下滑74點，收市報23215，成個反彈無力格，似聞到燶味咯。
美股下跌，原因係因為聯儲局鴿派成員轉口風，由反對加息改為主張加息，但可能還有一個深層原因，就係特朗普突然間在部份民意調查反敗為勝，由大落後變成些微領先希拉莉，呢位狂人入主白宮嘅可能性狂升。911十五周年紀念會上，希拉莉與特朗普同時出席，還未完畢，希拉莉體力不支，要提早離場，俾捷克遊客拍攝到上車時腳步浮浮，幾乎跪低，上車後先知甩咗一隻鞋，十分狼狽，醫生事後話佢係染上「肺炎」。希拉莉生於1947年10月26日，就快滿69歲，是否已經身體老化，健康走下坡，難以勝任美國總統一職呢？特朗普生於1946年6月14日，今年70歲，大希拉莉一年，但睇嚟比希拉莉更有精神，難怪佢猛烈攻擊希拉莉不肯公開健康檢查報告（特朗普自己就不肯公開報稅表），振振有詞。彭博立即訪問好多美股分析師，佢地認為美國股市到上星期五為止，完全相信希拉莉贏梗，冇理會過特朗普，但9月11日之後，美股要正視現實──特朗普可以偷雞擊敗身體不支嘅希拉莉，即是話美股要向下調整嚟反映番特朗普對全球經濟之破壞性及不穩定性。以後一兩次民調如確定特朗普領先，咪搞我，要錢唔要股票咯。
上一則: 自作孽 - 陶傑
下一則: 港姐的粗口 - 曾志豪
I
没有评论:
发表评论