【鳩嗚】意大利牛肝菌都係雲南貨仔 上山採菇直擊睇
菇，全部都係菇。大台10月31日新節目《煒哥的味道》，由J's Garden菁雲嘅Winnie帶藝員陳煒等去雲南尋寶，包括上山採菇。其實費清一早都跟Winnie去咗喇，而家搶先推《費清的味道》。
Winnie，又叫Winnie the菇，係(除非唔係)最早由雲南大量引入野生菇菌，除咗交畀citysuper等，仲交貨畀好多五星酒店。成日聽佢講上高山採菇，九月終於親身體驗。
費清呢啲窮L只識冬菇，近年先聽過黑白松露，仲有德國最愛嘅雞樅菌，法國人視為珍饈嘅羊肚菌，令日本人瘋狂嘅松茸，仲有意大利無處不在嘅牛肝菌。
約10年前喺美食博覽認識Winnie，佢當時剛引入雲南菇菌，事緣當年佢由美國IBM辭高薪厚職幫屋企做蒜頭生意：「去到雲南蒜頭貨倉見到一嚿嚿嘅嘢，好醜樣」。有個當地人對佢講「這些去意大利的」。當年（而家?）普通話麻麻嘅Winnie唔太知佢講乜，喺美國讀書、工作嘅佢仲心諗：「意大利點會要呢啲嘢呀」。
「查吓先知呢啲係牛肝菌等等！」Winnie話意大利人一早就知雲南有歐洲人趨之若鶩嘅野生菌，「當年中國人唔係好識」。聽講有啲雲南菇菌去咗歐洲轉一圈運返亞洲，賣貴好多倍。
Winnie今次同費清等去採菇，就搵返果位老實人帶路。費清久仰大名，果然一副老實樣，唔怪得當年踢爆意大利菌由雲南運去啦。小石同當地美女小李帶幾位港燦去麗江近郊山區，兩位輕裝上山，港燦就着曬行山裝，結果人哋如履平地，港燦喘曬氣：「好難行」、「好高呀」，港女團友仲跣腳一屁股跌落地．．．
當地人靠山吃山，小李輕鬆爬上高山，望一望已大叫：「找到了」。原來大片草地上，石頭縫隙就有松茸；兩隻手指公咁大，佢都可以一眼睇到。港燦仲喺度頭岳岳，小李已經搵到更多松茸，仲搵埋牛肝菌；牛肝菌比松茸大，肥啫啫好可愛。
費清同Winnie試掘菇菌，先鬆開周圍啲泥土，慢慢拔出嚟，整爛咗就價值大減，過程一額汗，但松茸、牛肝菌香氣撲鼻，辛苦都值得。小石話，採菇後要埋返泥土保護，因為生過菇菌嘅地方有機會再生，但破壞咗土釀就冇㗎喇，因為野生菌要極佳環境，空氣要絕對清新，更加唔可以有農藥。所以，野生菌被譽為泥土裡的寶石。費清抬頭，只見參天大樹，樹身都係空氣最清新地方先會有嘅地衣，難怪滿地寶石。
雲南野生菌有750幾種，產量佔中國85%，佔全球40%，而2015年雲南省總產量約3萬噸，出口達71799噸，總7723萬美元，出口品種為松茸、牛肝菌、雞樅等，出口20幾個國家地區。Winnie話就連最貴重嘅黑松露菌都有，而地人喺7至11月當季月份採菇後部分會新鮮食，部分留低風乾等。
Winnie話，採菌一啲都唔易，要落大雨後先比較容易搵到，但雨後山路難行，一日行好耐先採到少少，加上近年需求大，部分山區過度採摘，「遲啲可能冇得食」。廚藝了得嘅佢建議牛肝菌可用橄欖油煎香，又可以喺燉火腿蕃茄雞湯時，最後十分鐘落牛肝菌就會好美味。採完菇菌就交畀農家，請佢哋即席烹調，菇菌清炒已經美味，用嚟煲湯仲滿室香氣。
採菇期間，有一隻小狗沿途跟住，費清問雲南係咪好似意大利咁，訓練臭覺靈敏嘅狗去搵菇菌，但Winnie話當地人靠自己都搵到。原來隻狗係怕班港燦走失咋．．．
費清仲去睇漁鷹捕魚，有幾百年歷史嘅捕魚方法，訓練漁鷹捕捉洱海活魚，然後喺鷹嘴攞返啲大魚出嚟，再餵返細魚畀漁鷹作獎勵。漁鷹捕魚已經成為旅遊參觀項目，喺日本捕漁大賽攞過獎，但當地政府一年前禁咗呢個活動。（點解費清又會睇到？你懂的。）
費清20幾年前去過雲南，今日麗江古城遍地pub及karaoke，清雅不再，唯有山區因交通不便，仍保留靈氣。但喺現代中國，呢份純真仲可以保留幾耐？
費清＃要生計，也要生活＃毋忘初衷 
I
没有评论:
发表评论