曼谷寸步難行 - 左丁山
到過曼谷無數次，這一趟新年到曼谷，搵埋成家人共九大二小三代人，一於鬥hea，飲食行街按摩浸泳池誰知人多有人多之苦，就是曼谷街頭行路不易，到處有陷阱，長者嬰孩容易跣親，搭的士就到處塞車，寸步難移，搭高架鐵路啦，上還可有電梯，落就一定冇，叫行動不便揸枴杖之人行落二三十級樓梯，試過就知辛苦。
一日到法政大學「他拍贊」校園影完相之後，想話叫的士去Central Embassy，誰知校門外大塞車（其實日日如此），的士罕見，偶有幾架慢如蝸牛咁行過，司機全部拒載，逼於無奈行十分鐘去到附近嘅遊客碼頭，通道擠迫不堪，睇見牙煙嘅明火熟食攤檔群（一有火災，根本無法可救）之後，竟然就係見到天日，寬闊空朗之「類似三藩市」漁人碼頭，旁邊仲有Starbucks。於是買票上船，船費40銖，站站停，經過鄭王廟，唐人街等景點，35分鐘後到達鄭王橋BTS站，搭車到Siam再轉車到Phloen Chit 站落車，行天橋去Central Embassy嘅第五層，入一間叫做Hong Bao（雄包）嘅酒家飲茶，花咗足足一個鐘頭有多，一坐低，就唞大氣，覺得疲累不堪。幸好有幾位親戚唔去法政大學，直接由香格里拉酒店去Central Embassy攞枱，我地遲到一個幾小時都冇相干。曼谷實在係不適合行動不便、出入靠的士嘅人士嘅，來回食餐飯，隨時要預計兩個鐘頭時間，點搞呀！唔怪得位於BTS站旁邊嘅酒店（例如大倉）收費比香格里拉還要貴，係有原因嘅。
有咗地鐵，高鐵之後，地緣經濟情勢佈局零舍不同，好似曼谷咁，以前文華東方與香格里拉有湄南河景優勢，有城市渡假村感覺，大受歡迎，但現在大塞車日日如是，遊客就會避開，轉去BTS沿綫嘅酒店。好彩在農曆新年期間所見，大量中國遊客湧到，日日有旅遊大巴士泊在香格里拉酒店門口。早餐時間，咖啡室內講普通話嘅，佔咗九成咁滯，強國人成為泰國旅遊業大救星，唔怪得左丁山去咗幾個商場及三間酒店大堂，都見到大紅燈籠高高掛，到處「恭喜發財」，幾年前還未見有如此「盛況」！
講番轉頭，點解左丁山等人識去「雄包」呢？皆因一位親戚幾個月前到曼谷參與地鐵工程，同事帶佢去過，我地一齊在Zanotti吃晚餐之時，佢大力推薦之故。呢間雄包啲點心係粵式，古法炮製，豬油特多，所以特別有味道，比好多香港酒樓嘅點心好味，最過癮係當日推廣魚翅，買一送一，一千二百銖有兩大碗，抵到爛也！
上一則: 偏見下的狂人 - 陶傑
下一則: 可憐的薯粉 - 林夕
I
没有评论:
发表评论