林鄭特首有樣睇 - 左丁山
建制派鋪天蓋地咁為林鄭月娥造勢，捧到林鄭幾乎天上有地下無，好打得，乜都掂，得人心，商界愛戴，對手曾俊華就從人民內部矛盾升級為敵我矛盾，係外來勢力代表，不得中央信任，係打擊對象，即使在3月26日爆99倍大冷門當選，中央都不會委任咁講。曾俊華從自己人變成敵人，速度之快，令人嘆為觀止。
呢日見到一位愛國報紙離休幹部，左丁山笑問：「不久之前，你地還講番幾句曾俊華好話，現在則視之為頭號公敵，日日棒打，駛唔駛咁絕呀？」幹部E苦笑：「好彩我已經離休，否則會好辛苦，我啲舊同事同我講，日日奉命要寫三四版林鄭好人好姐，寫到人都癲，同時又要組織稿件痛批曾俊華，做得好慘呀！」呢啲文稿是否出於真心㗎？幹部話：「係奉命作文嚟嘅，算係文字工作者產品，老闆指導方向，咪跟住題目作文囉，你唔好鬧我地啲記者呀，大家搵食啫。其實幹部都分兩批，本土記者好似我呢種人咁，曾向上頭反映，不如等林鄭與莊曾自由搏擊，憑佢地自己政綱與手腕去爭取選委支持，咁就邊個贏咗都係光榮。但上頭嘅上頭話要維穩聽命，一定係要捧林鄭，咪要犧牲莊曾囉！」
咁葉劉呢？幹部話：「要捧林鄭就不能讓葉劉有機會鎅票，一早封殺佢，唔俾佢入閘，係護送林鄭入禮賓府嘅大戰略，葉劉唔聽話，梗要阻截佢㗎！」搞現實政治，理當如此，棄車保帥，司空見慣啫。
特區政府視林鄭為下任特首，已經按足程序招呼林鄭。據講林鄭上電台做訪問，早個鐘頭已有警方VIP保護組警長到電台「踩線」，詢問環境通道及第二條撤退路綫，策劃好部署，電台又要搵定阿頭定點迎接林鄭下車，警察啲行動好緊密，以確保林鄭不受閒人滋擾。呢啲行動無可厚非，警察保護特區政府要人係應該緊張啲嘅。但有比較噃，輪到曾俊華到電台接受訪問，VIP保護組不見人，警長冇露面，曾俊華與公關自動出現走入電台，冇人迎接。到走人嘞，曾俊華自己行去馬路搵車，兩名警察在後（三十呎後）搵對眼望實咁啫。一位記者話：「淨係睇排場已知誰是下任特首，啲警察好聰明嘅啫！」不過曾俊華硬係唔肯認輸，係要砌落去，佢以奧斯卡頒錯獎為例，乜都有可能發生，不過奧斯卡係一早幕後決定嘅，以後佢不妨以巴塞隆拿為例子，先輸四比零，次回合最後8分鐘反勝六比一！
Z88
没有评论:
发表评论