【西遊記】如何引導老婆追Marvel ? - 方俊傑
【文化籽：西遊記】
星期一晚Marvel又有新預告出街，《雷神奇俠3：神域末日》（Thor: Ragnarok）放棄了「諸神黃昏」為片名，惹來一地抨擊。不過，見到Cate Blanchett的歹角造型，見到變形俠醫重現江湖，聽見Led Zeppelin首《Immigrant Song》做配樂，耳目一新。又開始期待。明明月底套《銀河守護隊2》（Guardians of the Galaxy Vol.2）正在力谷宣傳，年中還有套《蜘蛛俠：強勢回歸》（Spider-Man: Homecoming），功課都未做齊，已經開始在意年底一套。有追開的話，會好興奮；無跟開的話，恐怕完全一頭霧水。
小時候，夢想是找到個愛看足球的老婆，而且跟老公一樣，一生一世支持利物浦。長大後，才發覺，找到個老婆毫不容易，找到個愛看足球的老婆更難，找到個愛看足球又支持利物浦的老婆是難上加難。一生一世最難。還是死心吧。找到個愛看電影的老婆已經好幸福，不要再強求對方的口味跟自己一模一樣。
可惜，人類總是貪得無厭。齊齊橫掃奧斯卡提名作品的幾個月，津津有味；到《盧根》（Logan）上畫，就只好獨自入戲院寂寞地享受。「Hugh Jackman最後一次扮演狼人喎？你都唔睇？」老公問。「我連一套《變種特攻》都無睇過，點睇呀？」老婆答。「無所謂㗎，唔使顧慮上文下理，咪當睇一個超級英雄如何折墮囉。都好好睇㗎！」老公開始有點牽強。「嘩，你就睇到勁有感情勁投入，我就唔知頭唔知路，點會有feel呀？得閒的話，當去陪陪你，還可以。我呢排好忙呀！」老婆終於正面拒絕。連Hugh Jackman都無法打動老婆，徐錦江又怎可能做得到？
不到黃河心不死。我想盡方法引導老婆入魔。是有點難度。《迷幻列車2》（Trainspotting 2）上畫，想說服一位藝文青撥冗觀看二十年前的第一集，很容易。《迷幻列車》（Trainspotting）大名鼎鼎，而且九十分鐘啫，題材又男女皆宜。Marvel擺明是打打殺殺拯救地球，看上去好像沒有甚麼營養，藝文青老婆一早表示沒太大興趣。最麻煩係Marvel太勤力，不計電視劇，單計電影，由2008年《鐵甲奇俠》（Iron Man）計起，到去年的《奇異博士》（Doctor Strange），已經推出過十四套互有關連的作品，假設每套電影片長兩小時，不眠不食不休睇足一日一夜也無法完成整個系列。So sad。
循序漸進。我決定每次觀看新片，都先重溫有關連的舊作。睇真人版《美女與野獸》（Beauty and the Beast）之前，先睇1991年的動畫版；睇《春嬌救志明》，先補回《志明與春嬌》、《春嬌與志明》；五月要睇《異形：聖約》（Alien: Covenant），先再看四集《異形》（Alien）再添多套《普羅米修斯》（Prometheus）；想睇《狂野時速8》（The Fate of the Furious），咪先睇頭七集囉。由動畫到愛情片到恐怖哲學片，再去到男人的浪漫，由一變二變五變七才變十幾，感覺上，會輕鬆了。對不對？
「其實，點解你係都要逼我同你一齊睇Marvel啫？」老婆有點發脾氣。「沒甚麼的，只不過，我覺得好看的東西，我欣賞的東西，好想跟自己重視的人分享箒。就似去了冰島賞極光，去了馬爾代夫看海水，去了秋田賞櫻，也會希望有你在我的身邊一樣。」說完，我看見老婆偷偷浮現一副冧樣。我佩服自己的急智。「所以，睇完Marvel，你記得要在聖誕前同我睇番八集《星球大戰》（Star Wars）呀！唔係，點睇《星球大戰：最後的絕地武士》（Star Wars：The Last Jedi）喎？」
距離找到人陪我追Marvel，又行前一大步了。我不擔心能否持續。看Marvel，開了個頭，應該會有追下去的意慾。不過，六月還有《神奇女俠》（Wonder Woman），十一月還有《正義聯盟》（Justice League）……
Profile：方俊傑
觀塘長大，壹仔打滾，偏愛西片、西劇、中日韓美女。利物浦悲慘球迷，非西人一個。facebook:方俊傑
撰文：方俊傑
編輯：陳漢榮
美術：孔文彬
I
没有评论:
发表评论