消息與利率 - 左丁山
近兩星期港股指數表現不俗，與內地A股疲弱情況，恰恰相反。彭博有報導話，習近平好有可能在七月一日到港一行，「國家隊」已收到指示，隨時準備托市維穩，唔俾恒指在慶回歸二十周年嘅歡樂時光下跌。既有此一說，則股市上升並不奇怪，但睇番上海股市嘅經驗，A股大跌之時，咪成日話「國家隊」入市嘅，卒之咪又係冇鬼用，「國家隊」其實係大大聲，細細說，往往虎頭蛇尾，最終難敵市場大趨勢，否則嘅話，滬綜指做乜成日在3000點邊緣徘徊呀。本港股民如相信「國家隊」有力托高恒指，凶多吉少，猶記得九七前，股市曾經不斷上揚，當時有一派政治經濟理論，話利用馬克思思維，睇穿北京要面子，回歸大事在即，必然運用各種力量推高恒指，營造昇平景象，故此股民大可以乘機炒一轉，發吓回歸財！
呢派理論錯唔晒，最初好掂㖭，點知美帝之投機格言：買消息，沽事實（即係有消息傳出時就入貨，正式宣佈成事後就沽貨），差不多永遠是對的，九七年七月一號之後，慶祝回歸完畢，金融風暴嘅黑雲，已經吹到維港上空，用上述理論買股票而貪勝不知輸者，最後輸到目光呆滯，成為負資產。
長期投資不是投機，不要受甚麼消息影響買賣。美國股神畢菲特最近召開股東大會，幾千名擁躉一年一度往奧馬哈朝聖，有小股東問畢菲特有甚麼神級數據指示買賣呀？以前畢菲特提過兩個數據，其一係股市總值與GDP比例，其二係諾貝爾經濟學獎得主，耶魯大學教授Shiller所創嘅CAPE（Cyclically Adjusted P/E），不過今年畢菲特話反璞歸真，長期投資只考慮一個數字，就是美國國庫30年債券利率，萬事皆反映在利率中，對眼要對利率吼到實。再進一步了解，就係經調整通脹後嘅實質利率。就此問題，適逢校友會午餐例會，左丁山邀請財資專家T向校友講解未來利率走勢，財資T話最近數據顯示，因科技進步，不少貨品價格備受下調壓力，失去議價空間，通脹好難上揚；其次係又因科技代替人力，全世界工資增長緩慢，個人收入及消費力難大步向前，唔會推高物價。以此觀之，中央銀行難搵藉口推高利率，美國今年頂多加埋第三次息，加完之後利率仍然處於低水平。咁講法，有乜投資玄機？財資T話請大家自行下結論，佢係銀行高層，不便公開作答！
Z88
没有评论:
发表评论