http://hkm.appledaily.com/detail.php?guid=20114752&category_guid=15307&category=daily&issue=20170808
中環在線： 郭Sir健身室𥄫中陶傑 - 李華華
郭Sir（左）噚日同陶傑互送高帽。李潤芳攝
籌備超過半年、投資近千萬嘅民眾財經台今日開台，民眾證券董事總經理郭Sir（郭思治）除咗講股兼教人操肌之外，又搵到香江第一才子陶傑坐鎮。陶傑謙稱，佢唔係財經專家，但希望可以用歷史文化角度分析，例如講下文化產業點樣影響全球經濟走勢。
陶傑同郭Sir噚日喺記者會上互送高帽，話係對方Fans，識英雄重英雄咁話。聞說，佢哋係喺健身室結緣，郭Sir形容，當時離遠已經見到陶傑，自己一路望住佢，但又唔敢行埋去，直到陶傑走為止。而陶傑就講笑咁話，郭Sir可遠觀而不可褻玩，家陣有機會埋身切磋，真係三生有幸。
直播App唔准講政治
除咗陶傑主持嘅呢個王牌節目，港台前節目監製劉羽葳都會幫民眾財經台做節目。睇佢嘅節目嘉賓陣容又幾鼎盛下，包括董偉、湯文亮、汪敦敬、黎永滔、李根興、祁文傑、盧志威等等。
郭Sir話，民眾財經台好大程度上北望，所以普通話時段會佔70%。佢又補充，籌備緊民眾財經直播App，除咗直播民眾財經節目外，未來都會設有個人直播功能，畀分析員喺上面分享投資心得，仲會有功能畀分析員以外嘅人講嘢，但郭Sir強調，飲食、娛樂乜都講得，但就唔可以講政治喎。
I
没有评论:
发表评论