廚師退星 - 左丁山
曾智華退休後，日食夜食，周圍搵靚嘢食，價錢不拘，總之要正。近月，佢嘅老上司尖嘴輝，即係當年（1977）請佢入香港電台做節目主持嘅吳錫輝自倫敦回港，號召一班死黨周圍去食，有星（米芝蓮星）就幫襯，環頭環尾無星食肆，只要餸菜新鮮鑊氣夠，一樣殺埋，於是乎曾智華食到肚仔碌碌，肥咗幾磅咁話。尖嘴輝在倫敦幾難搵到又平又靚嘅中菜食，梗係趁回港小住之便，食七咁食啦，阿碌曾平時已經日日食，俾舊老闆捉住一齊去，直情食到頂住。
阿碌話一啲環頭環尾小食店，街坊捧場，平時其門如市，如被米芝蓮品題送一粒星或作推介，即刻唔得掂，門口大排長龍，廚師根本做唔切，變成有好大壓力；跟住業主睇到咁好生意，一到租約期滿就大幅度加租，店主不能負擔，唯有搬竇，忍痛捨棄一班街坊舊客，故此小食店攞星，未必係好事，有時反而受害。唉，加租呢回事，邊個業主唔想，但有陣時加租狼得滯，變相趕走一星餐廳，成條街冇咗食客，立即變成寂靜地帶，鬼去租舖咩，於是業主反為蝕揸米，或者要減租嚟吸引新租客㖭。
幾乎個個廚師恨攞星，情況仿似個個演員都想攞金球獎甚至奧斯卡獎，廚師視攞到米芝蓮一星、二星、三星為一生職業生涯之最高成就，但攞星之後，威水一番，面子十足嘞，壓力隨之而至，一路要拚命維持水準，而又要同時賺錢養住班夥計，精神就會拉得好緊張，所以法國就發生一啲星級廚師自殺嘅新聞。
去年年尾十二月二十九日紐約時報就有一篇詳細報道，講法國一位名廚Jerome Brochot決定退回「一星」唔要咯，理由就係賺錢壓力大到不得了！呢位名廚在Burgundy著名釀酒區內一個小城叫做Montceau開店多年，近年整體經濟不景，城市失業率高達21%，市民多年來不斷節衣縮食，於是名廚間一星餐廳愈來愈少人幫襯，門堪羅雀，令名廚兼東主負債難以償還，箇中理由係，若要得到一星，食物材料要靚，招呼要好，餐廳裝修夠雅致，正是在在需財，但市民街坊食唔起一星靚嘢噃，餐廳晚晚要丟棄高價魚，令名廚肉都痛，於是最後決定要銀紙唔要面子，退還一星畀米芝蓮，改賣平魚、平價食品，減價吸客，餐廳改走大眾化路綫，市長就好唔高興咯，認為名廚退星有損Montceau形象，更難吸引遊客。攞唔攞到米芝蓮星，與當地經濟好有關係，香港有咁多「星」，皆因有錢食客從來不缺也！
没有评论:
发表评论