九級骨牌效應 日系機最少貴一成
2011年03月22日日本九級大地震，引發另一場搶購災難。上星期，本港水貨場已全線告急！由於日本當地停電停產，骨牌效應之下，日系手機、頂級單反，以至日版遊戲都出現斷水斷糧嘅情況，更有水貨商表示，由於存貨數量唔夠，已開始要加價，機價最少貴一成！
記者：陳國輝
攝影：陳陶鈞貨源短缺 3D機即時加價
手機品牌眾多，歐美牌子影響較小，相對日系機情況就嚴峻好多！喺先達專售日本機嘅三禾電氣店長 Simon話，自從地震發生之後，唔單止日圓急升，增加成本負擔，更大難題就係當地運輸出現嚴重塞車，以往經 UPS、 Fedex兩日就可以送到；但上星期就足足花咗 6日，甚至連速遞公司都話「唔會有確實到貨日期」，即是說，幾時有，幾時無，都要聽天由命。
「現時可以做，就係繼續出售存貨。」 Simon話，最近新出嘅 3D手機，貨源已經不足，加上日本運送無期， 003SH以及 005SH已分別加價$200；另外，三款熱賣型號，包括 SH01C、 F01C以及 945SH高達特別版，暫時仍維持原價發售，佢話，當唔夠貨嗰陣，最少會調升百分之十。
■三禾電氣店長 Simon表示機價最少升一成。
■訪問中途有速遞公司送貨，但已是 6日前訂購的手機。
■ 003SH（上）、 005SH（下）本來賣$4,180及$4,080，但上周已加價$200。
■ SH01C（左）$3,780/F01C（中）$3,780/945SH（右）$3,980。因供應問題，呢三款型號預計會調升最少百分之十。
日本推出無期 iPad 2 3G升 5%
■ 3G版加價，然而 Wi-Fi竟出現插水情形。
現貨短缺，加價勢在必行，就連預定本月見街嘅 NEC N04C以及 Xperia Arc（日版），亦因生產線停電無限期押後；原本 4月 DoCoMo打算進行嘅全線日系機 SIM Unlock，亦未有重推日期。至於大家最關心嘅 iPad 2，原定 25號日本發售，亦宣佈取消。水貨佬話，雖然日本無貨供應，亦未見先達有明顯炒風，不過上星期 3G版就加價 5%，料 25號之後售價會調整。
■廠方已宣佈 N04C及 Arc延期推出。
頂級鏡缺貨 Body賣斷市
「重災區」可能係單反 DC！據相機專賣店 DCPower阿俊表示，好似 Canon、 Nikon等已經喺日本官網上宣佈，由於當地廠房電力供應問題， Lens等光學元件需要暫時停產，而對本港，特別係頂級鏡頭嘅影響最大。
「地震發生之後，日製最受港人歡迎嘅 F2.8頂級鏡頭率先被搶購，而淨 Body更已斷貨！」阿俊話，喺日本生產嘅 Canon淨機身，例如 7D、 5D、 Mark II，以及 Nikon D3、 F6早就賣斷貨，亦唔知幾時再返；至於呢期好 Hit嘅 M4/3相機如 GF2，由於 Body都喺日本生產，佢話存貨唔多，只夠應付 8至 10日。
不過， DC水貨市場就無手機咁活躍，現時賣街嘅主要係行貨，只有小量水貨出現炒風；再講， Canon水貨鏡頭最多炒升一成，以接近行貨價出售，情況未算誇張。
■相機專賣店 DCPower阿俊
■包括 OM在內嘅頂級鏡頭，全部由日本製造。
■ E-PL2貨源比 GF2無咁緊張，約應付兩個禮拜。
■日產 Body 7D、 D3已賣斷貨，只有泰國生產嘅 D700、 3100、 300S不受影響。
老任 3DS微升 《無雙》見$700
■遊戲專賣店 i-Gamer阿康
Game界亦受到天災影響，但主要係日版遊戲延遲發售時間。例如 PS3嘅美版《人中之龍 4》、 NDS《實況 Golf》同埋 Wii《遊戲王 5D》等，全部都未有正式推出日期；但據 Game場人士阿康話，其實《人中之龍 Of The End》以及《真三國無雙 6》，喺未推出前已經有一部份流入市面，未知幾時推出情況下，更炒升至$600至$700！
遊戲主機亦出現炒風，據講，推出唔夠一個月嘅老任 3DS，雖曾於一星期內急跌成千蚊，不過地震災難後，售價有回升之勢。據講，淨機價已由最低點$2,100回升至$2,300多，若供貨情形持續惡化，或會進一步加價；另外，有網上消息指 PS3因海嘯被冲走 12萬部，不過阿康話對機價仍無任何影響。
■老任 3DS低位反彈，已回升至約$2,399。
■《人中》據講有小量貨源已流入市面。
没有评论:
发表评论