探熱針
大肚楊思琦送綠帽 9年 情敵寸豪仔：我中彩，唔係你！
2011年07月07日今年五月中傳過婚訊的楊思琦與李泳豪，九年情忽然甩尾轉向，上週，女方單獨公開宣布分手，背後原因是她瞞住全世界玩劈腿，與舊同學 Andy翻撻多年，近日更意外懷了 Andy種，焗住二揀一，與搵錢能力長期較她弱的泳豪斬纜。
搶人女友，兼夾搞大楊思琦個肚的第三者 Andy，不單無「見好就收」，還得寸進尺，以挑釁短訊向輸家泳豪宣示勝利，又自爆與楊思琦秘密交往十一年，令泳豪慘戴綠帽九年之久。幾乎飲到新抱茶的李家鼎，對 Andy的攞彩挑釁，再在微博暗寸泳豪扭曲真相，扮受害人搏同情，忍無可忍說：「搶人女友仲講埋呢 啲無天理說話，佢夠膽就三個人企出嚟講清楚！」慳妹變大話妹
表面上楊思琦對拍拖九年的李泳豪一往情深，即使外界將二人定位為「女尊男卑」，仍然對男友不離不棄。誰想到原來裡外不一，她與從商的舊同學情人 Andy Ng一直暗度陳倉，劈腿多年。交足戲，楊思琦今年五月中仍十指緊扣為見得光的男友李泳豪慶祝生日，又任由男友公開宣布年底結婚，令外界及李家均相信這段九年情開花結果。
上週，楊思琦忽然單方面宣布分手，為掩飾自己劈腿罪行，思琦慳妹變大話妹，訛稱分手一事與泳豪早有共識，亦知會雙方家長。女方斬纜，李家上下包括局中人泳豪，都是分手消息被公開後才知自己被狠飛。紙包不住火，思琦火速被踢爆飛正印男友原因，是她懷有第三者 Andy的 BB。
承受同居九年的枕邊人偷食，兼夾 BB爸爸不是我，已經夠傷的李泳豪情緒全面失控，提到分手就喊，最攞命是情敵 Andy咬住唔放，發出數個微博私信大講風涼話，向輸家泳豪宣示勝利，立壞心腸。
本週二早上， Andy又在微博發功，暗寸泳豪扮受害者博同情及扭曲真相；不過此留言一出，五分鐘又被刪走。
「呢段時間，豪仔已經好 hurt，情緒好低落，點知個 Andy仲要 send埋呢 啲囂張說話挑釁豪仔，搞到佢好嬲情緒好唔穩定，真係好過分。之前思琦宣布分手， 嗰個 Andy已經即刻 喺微博耀武揚威咁話：『這個月是值得紀念的月份，十一年的戀情終於有了結果，我會盡最大努力，照顧和愛護她。我相信一定能讓她幸福，這個誓言將會是永遠。』不過唔知係咪分手件事越鬧越大，形象插水 嘅思琦可能叫 Andy唔好咁寸，宣示勝利 嘅留言出咗幾分鐘，就被刪除。」李泳豪好友說。
真係笠到應！（設計對白）
據知思琦的媽咪一向嫌棄泳豪搵錢唔夠多，故多次勸愛女思琦趁後生搵過第二個，如今她的心願已達成。（《忽然 1周》圖片）
今年五月泳豪生日當天，思琦仍以女朋友身份與他及好友們打邊爐慶祝，並送上蛋糕，絲毫沒有分手前的先兆。
挑釁私信
有指 Andy以私信向輸家泳豪贈興，說話夭心夭肺。
去年的十二月，楊思琦曾被拍下帶陌生男子與父母在酒樓晚飯，如同見父母一樣，估計對方就是 Andy Ng。
○八京奧復合
講心唔講金原來只是煙幕，表面簡單的楊思琦，其實早已背住李泳豪搵後着。據知， Andy是思琦在教育學院的普通話班同學，○○年，二人拍拖半年分手， Andy北上從商，思琦則參選港姐入娛圈，並跟李泳豪拍拖。有指她與 Andy一直藕斷絲連，二人背住另一半斷斷續續有來往，○八年，思琦到北京採訪奧運，跟 Andy正式復合。
Andy在他勝利的微博留言中，坦白承認十一年情終開花結果，劈腿保密功夫做到足的楊思琦，令李泳豪戴足九年綠帽，懵然不知。就算決定分手，思琦仍用情深短訊「我仍然愛你，仍想念你！」「就算離開，我仍永遠愛你！」 氹住對方，以免劈腿罪行越踢越爆。
「思琦呢兩年每逢大時大節，就同屋企人返內地玩，一係就話要登台，試過一去就成個月，至少兩個星期。唔知係豪仔太信佢，還是唔想面對，總之女朋友話係做 嘢，佢選擇信晒，依家水落石出啦，原來佢成日返內地陪 Andy。今年二月，思琦買清水灣半島，表面係方便返電視城，所以搬返去同屋企人住，查實係方便 Andy每個月返香港見面。思琦都好醒，每次北上陪完 Andy，佢一定抽番時間去豪仔屋企 瞓，所以豪仔唔會察覺佢出軌。」知情者說。
有關第三者 Andy發挑釁短訊，李泳豪不願接受訪問，由哥哥泳漢接聽，「我唔想對呢 啲人作出任何回應，費事有失我 哋身份。
「細佬自己好傷心，但仲擔心番女友大肚，怕佢承受唔到輿論壓力，我同細佬講：你少擔心，個女人硬淨過你就真！」
思琦與泳豪相戀時，外界並不看好，更指男方食軟飯。但原來女方寄居在施明九龍塘寓所時，無論屋租、水電，一個崩都無出。身為港姐冠軍的她，多次被拍下與豪仔食茶餐廳撐 枱腳。
泳豪失戀，媽咪施明激動到暈咗幾次，而哥哥泳漢亦擔心情緒極度低落的弟弟，經常陪伴安慰。（《蘋果日報》圖片）
思琦在六月廿四日曾在微博轉載一段有關分手的說話，似為廿八日單方面宣布分手埋下伏線。
在思琦單方面宣布分手當天， Andy即在微博發表勝利宣言，不過很快便刪除。雖然如此，但有粉紛已將他的留言轉載。
李家鼎反寸 Andy
李家鼎在思琦狠撇泳豪後，怕愛兒情緒受困，故連日來充當柴可夫，駕車接送失戀的泳豪。
曾揚言當楊思琦係半個女的李家鼎，上週從記者口中得知她狠撇泳豪後，一度嬲爆：「佢黐線 o架！仲 plan緊結婚，死人都有先兆啦！」事隔一週，鼎爺得悉第三者玩嘢挑釁被飛的泳豪，更加忍唔住出聲鬧爆 Andy。
壹： Andy係咪以短訊挑釁泳豪？
李：我知呀！負面睇法就係玩 嘢，但正面睇咪當佢扮有風度囉！
壹：佢仲 喺微博寸泳豪扮受害人搏同情！
李：（開始有火）全世界都知係佢搶人女友，佢仲講埋呢 啲無天理 嘅說話，扭曲真相？佢夠膽就三個人企出 嚟講清楚。
壹：你對楊思琦有咩評價？
李：若一切傳聞係屬實，我只可以講乜佢原來係咁 o架！我個仔戇居 咗咁多年？其實到依家我都有好多問號，明明四個月前阿仔同我講計劃年底結婚，當時思琦仲 喺旁邊聽住，佢仲話擺酒嘅話，佢屋企要擺四、五十圍。點知突然話分手，或者背後有人 push佢咁做。
壹：你指 嘅係咪思琦媽咪，傳聞對方一直嫌泳豪收入少！
李：我唔知，唔想講人 哋！狂供樓
清水灣半島
楊思琦現時孭住三層樓供，經濟壓力下，難怪她選擇有米 Andy棄泳豪。
清水灣半島中層單位
買入： 651.8萬（ 10年）
現市值約： 840萬
麗港城低層單位
買入： 263萬（ 07年）
現市值約： 392萬
泓景臺高層單位
買入： 393.3萬（ 06年）
現市值約： 615萬
没有评论:
发表评论