點了最平的澳洲牛肉，切得厚薄均勻，對一眾後生仔女來說， OK啦。
試食王
點解牛肉淥唔熟？
2011年08月04日大陸食品，你真係敢擺入口？竹筍唔係竹筍雞蛋唔係雞蛋西瓜曉嘔白泡，上星期，仲發現有疑似假牛肉，放入滾湯內半分鐘以上，仍然一片血紅，淥極淥唔熟，片段擺上網，嚇死正常人。有網友質疑牛肉加了牛肉精，或是其他化學物，店鋪經理堅稱牛肉已熟透，因為血水問題，所以先看似未熟。咁都得？記得以前曾有「勇士」挑戰超難食明將壽司，今次，由我身先士卒去尋找神奇牛肉。
出事的牛陣，屬日本牛肉公司但馬屋旗下，自 2007年開業至今，以平價火鍋放題作招徠，現時已擴展至七間分店。試食當日致電訂枱，全部滿座，要親自去排隊，可見事件冇影響香港人的打邊爐鬥志。六點幾入座，唔使等位，問侍應邊一款湯底夾邊款牛肉較好，她答道：「睇你個人鍾意咩口味囉。」等於冇答。
湯底及牛肉很快已經上枱，點了最平的普通牛肉，賣相都唔錯，顏色鮮艷亦有小量油花，睇落好新鮮。放入湯中，有變色，好彩，牛肉是正常的。平心而論，味道中規中矩，只係質地嚡咗啲啲。豬肉反而鮮甜，肥瘦亦適中，追加第二碟質素都唔差。但服務真係麻麻，入座時，我仲見到有侍應瞓緊覺。收碟快，但唔會主動幫你加湯、斟茶，人人好似發緊夢。侍應話湯底已包埋雞蛋，我發現雞蛋一直唔見影，侍應先話：「我哋而家只有美國雞蛋，唔建議生食，如果你肚痛，公司唔會負責。」咁你就唔好話有啦。另一要彈，是 衞生問題，張枱黐，自助餐枱用來盛食物的碟仍然有半條金菇在上面，污漬斑斑，枱底又有條蟹柳。離開時，見到有張標榜食物安全的海報，真諷刺。無計，一個平字，乜都要忍耐，有熟的牛肉俾你食，仲想點喎？
自助餐枱上得十幾款蔬菜及配料， iSQUARE店的秀珍菇、粟米、日本麵，旺角店一律欠奉。
湯底味道唔錯，清湯烚肉類較清甜，而甜豉油烚蔬菜類、烏冬較入味。
本來供應日本雞蛋，但改成美國來貨仍然要$8一隻，貴過本地音樂蛋呀。
旺角店冇比 iSQUARE分店平，任食雪糕仲要以 Dreyer’s代替 Haagen-Dazs，唔抵噃。
幫襯的，都是旺角年輕人，肯花時間排隊。
旺角分店比其他分店細，抽風系統亦做得差，差點焗死。
評分
食物：★★★
服務：★★
環境：★
價錢：★★★★牛陣
地址：旺角砵蘭街 240至 244號旺角文華 3樓
電話： 2787 0025
營業時間： 12nn-11:30pm
價錢：混合湯底套餐$128/位起試食王
喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。
飲食特務 B
美食博覽升呢 免費試鮑魚
今年美食博覽首次開設「尊貴美食區」，只於 8月 12日至 14日開放，展品高檔得多，如貴價海味、頂級咖啡豆等，又邀請了城中名廚即席示範菜式。但，美食博覽喎，當然唔少得有平嘢執，首四晚設「晚市着數特區」，大量食品半價。要留意恆興行（ 1樓 1B-C24攤位）於 8月 11日及 13日設免費試食日本七頭網鮑，鴻星（ 2樓 91號攤位）亦有$1買鮑魚優惠，限量供應，要掃趁早。
美食博覽
地址：灣仔會議展覽中心
查詢： 1830 668
日期： 8月 11至 14日 10am-10pm
8月 15日 10am-6pm
票價：$25，尊貴美食區$50，可憑美食博覽入場券加$25換購caffè HABITU-
開咖啡學院
近年捲起精品咖啡熱潮，連鎖店 caffè HABITUˉ，最近開設了一個咖啡學院及烘焙工房。唔做生意，主力開班授徒，設拉花藝術、咖啡試味、咖啡配食物等唔同課程，仲有證書同咖啡杯送。地方大，仲可以來個 Coffee& Art Jamming。
地址：銅鑼灣禮頓道 128-138號希雲大廈地下 3號
咖啡沖調班
日期： 8月 13日 2:30pm-3:45pm
價錢：$188
拉花藝術班
日期： 8月 27日 2:30pm-4pm
價錢：$248
網址： http://www.caffehabitu.com/ourcaffe/coffeeclasses.htm
没有评论:
发表评论