2012年9月20日星期四

蘋果日報- iPhone 5抵港　粉絲一路罵一路愛

iPhone 5抵港　粉絲一路罵一路愛

實試iPhone 5　香港地圖變3D

蘋果iPhone 5明天正式開賣，香港成為首個開賣地點之一，據講預售速度比4S還要快，可見果迷有幾咁期待！今日我哋就率先取得港版的iPhone 5實機，感受呢部加長版iPhone速度有幾爽之餘，原來佢仲好斯文，識勸你唔好講粗口！記者：許福合攝影：譚盈傑

模特兒：Mandy@PureModels

講廣東話：Siri唔聽粗口

作為近期焦點，相信好多人見過iPhone 5照片，筆者更加期待係試吓新加入功能，當中包括等了好久的廣東話Siri！試了幾天，廣東話辨識正確率都有七、八成，但要留意中英夾雜準確性會差好多。一般操作可以叫Siri撥打電話、查天氣、增加提示、行事曆等，想聽歌，只要講：「我想聽陳奕迅嘅《重口味》。」立即會自動搜尋播放《重口味》。對答都算係人性化，只係有時部份字詞音調會較高音，聽落有點怪異。心情唔好用廣東粗口問候Siri，雖然唔會顯示粗口字，但Siri會好有禮貌回答：「大家斯文人，唔使講粗口嘅。」見火氣咁重，更會勸你：「做乜咁火爆呀？不如冷靜吓先啦！」不過Siri部份本地搜尋功能未完全開放，例如我問佢：「附近有無餐廳？」Siri只能回答搵唔到。

售價：$5,588（16GB）$6,388（32GB）$7,188（64gb）

查詢：Apple（800 908 988）

想聽陳奕迅嘅《重口味》，直接叫Siri就可以點播。

亦可以從Siri問到NBA最新賽果。

機身拉長：鑽面切割更具美態望落似舊機，但據蘋果所講，iPhone 5屬完全重新設計之作；4吋Retina屏幕，解像度為1,136×640，外表上是舊機拉長些少，用意係保留用家單手操作的便利，加上厚度只有7.6mm，重112g的機身，手感甚佳。至於顏色方面有黑色及白色，使用鋁金屬及玻璃機身，環繞顯示器的斜邊是以鑽面切割，比較之下黑色機更能凸顯線條。另一個果迷舉腳贊成係放棄了30pin接線，以新介面Lightning替代，插頭更細，更無分底面，接駁上好用得多，耳機插頭更由機頂搬到機底，插耳機聽歌時就更順手。

新機會使用A6晶片，比起上代的A5，在不同類型的操作都會有近兩倍提升，無論在開關App都顯得流暢，無遲窒的情況。800萬像素iSight鏡頭亦係重點，能低光拍攝及減噪效果更佳，新增的全景相模式，可簡單地一掃拍攝及製作全景相片，而相片更可與透過照片串流與朋友分享。

機背的鋁金屬，是與Macbook相同物料。

黑色機更能凸顯鑽面切割斜邊線條美感。

香港地圖：3D會展ifc

另一個蘋果版的《地圖》，發佈會上睇到英國大笨鐘的3D效果，但在香港區地圖只有一般Flyover效果，比較明顯有ifc及會展，而地圖能顯示中文，但大廈的名稱未能詳細列出。與原有的《Google地圖》比較，同樣以朗豪坊作中心，新《地圖》只能顯示街名，實用性一般，目前都係要等Google推出《Google地圖》App或用回網頁版。新《地圖》的導航功能具備語音提示，對駕車人士會較好用，但暫時還欠缺公共交通工具的資料。

新舊《地圖》比較，蘋果版資訊暫不及Google版詳細。

倫敦地圖建築物，靚到似《Sim City》。

香港地圖，暫以ifc及會展較為「凸」出。

導航功能具備語音提示，啱晒揸車人士。

new look

Lightning介面插頭更細，且可雙面使用。

新的EarPods將成蘋果標準配備，音色更佳。

新的音樂播放新介面

iOS 6新電話介面

4G實測：網快200倍

SIM卡會轉用nano-SIM卡，比micro-SIM細44%，選用LTE網絡，理論上速度可達100Mbps，另外亦支援HSPA、HSPA+及DC-HSDPA制式。

筆者以《OFCA》App測試速度，一般下載可達到29.83Mbps，而與3G的4S比較，平均只有0.13Mbps，速度快200倍有多。再試下載Apps及YouTube影片，裝好Apps開Game玩，4S都仍在下載中，有如在用寬頻網絡一樣。

《OFCA》速度測試

iPhone 4S （3G）

下載0.13Mbps

上載 0.09Mbps

iPhone 5（LTE）：

下載 29.83Mbps

上載 13.3Mbps

iPhone 5使用更細的nano-SIM，比micro-SIM細 44%。

先達報料：首輪回收價$7,800

萬眾期待的iPhone 5除了睇功能外，好多人都問有無得炒呢？問過三禾電氣的Simon，第一日的16GB回收價起碼叫到$7,800，有心放機的就要留意，最好入16GB，水位會比較高。Simon亦指出頭幾天的回收價都幾穩陣，據講業內人士需要好高，不過長遠而言都要睇大陸需求，要注意係因為新機用上nano-SIM，大陸用家使用上可能會有障礙，而傳聞坊間已推出nano-SIM的Cut卡器，但至截稿前仍未能證實，相信炒家會冒一定風險。