李嘉誠：講真話 做實事 有貢獻
3,901
■長實業績發佈會上，公關多次阻止記者提問政治題目，但李嘉誠反而樂於回答。程志遠攝
【本報訊】長實主席李嘉誠在業績發佈會上，三次提及做特首的條件是要「講真話」、「做實事」、「有貢獻」，暗寸誠信破產、講多過做、施政處處碰壁的行政長官梁振英。被問到現屆政府有否干擾市場，李嘉誠一度沉思，再指「現階段」不應批評政府。
記者：李以莊擅玩「語言偽術」的梁振英，上任至今誠信問題一直備受質疑，由一開始撐唐英年的長實主席李嘉誠，昨在業績記者會上，被問到下任特首是否要「愛國愛港」，雖然公關已代為「擋駕」指不回答政治問題，李嘉誠最初笑而不答，但面對記者繼續追問，「唔答又答」的他突提高聲線：「我淨係答你『愛國』呢兩個字！愛國，係要真真實實，你愛自己嘅國家，你講真話！做實事！有貢獻！呢個係一個國民應該做嘅事！」
「問自己對唔對得住港人」
李嘉誠惟恐眾人未聽清楚，笑笑口再說：「我講嘅，我再repeat（重複）一次！你愛國呢，係要講真話！做實事！有貢獻！我哋的國家先富強。（國家）主席（習近平）最新講『中國夢』，我好欣賞！」
現場記者立即追問有誠信問題的是否不應該做特首，李嘉誠沒有正面回答：「過度的我不批評、過度的絕對……因為牽涉太多，世界（啲人）批評好容易，但做得到呢……先至難。」突然再第三度重複「真話論」：「你做實事！愛國家！講真話！係有真實嘅貢獻，呢個係愛國嘅表現。」
被續追問這是否做特首的「必要條件」，李嘉誠低頭稍一思考：「我唔答落去啦……」然後邊說邊笑，除下眼鏡：「因為呢……呢個問題我並冇諗……實在冇好啲答案，坦白講……講其他嘢啦，我完全冇準備呀！」然後有記者再明言梁振英受質疑，李嘉誠本來拒絕回答，但又再次忍不住：「我自己嚟講，我日日都問自己呀，我對唔對得住香港人？」似勸梁振英要撫心自問。學習西方國家「胸懷大啲」
長實早前拆售酒店雍澄軒，先摑梁振英政府一巴，政府其後又提出收回3G頻譜以作還擊，長實與政府關係劍拔弩張。被問到「限奶令」、「壓樓市措施」是否干擾市場，一直口若懸河的李嘉誠，要低頭思考達四秒後才口窒窒回應：「在我……睇個政府政策呢……呢個……（再停頓三秒）……睇多一個時候啦，今日呢，都要睇耐些少，不能夠批評呢個政府或者係乜嘢……都要公道啲，啱唔啱呀？」
去年行政長官選舉，梁振英於選情後來居上，但李嘉誠直至投票前一刻，仍公開表態支持另一候選人唐英年，他昨坦言梁當選後：「未到過佢屋企！」但重申「禮賓府有去過，佢亦都請我食飯，我亦都有請佢食飯，但真係大家都忙碌。」業績會上唇槍舌劍暗插梁振英，李嘉誠最後亦「兜一兜」：「要學番某啲西方國家，競選完咗就完咗，中國人有一個情形，幾乎呢、頭先唔覺意、唔記得，藐一藐嘴你，你就同佢終生結怨，唔好咁！應該胸懷大啲。」投資遇困難因遭妒忌
【特稿】不少聲音認為梁振英政府推出不少政策都向中資公司傾斜，李嘉誠指暫無此感覺，不過他承認在香港投資有困難，因為多年來惹來很多人妒忌，「以前覺得唔正常，家覺得正常。」
強調「真心真意愛香港」
被問及香港現時的營商環境是否變得較困難，李嘉誠沒有正面回應，只表示香港勝在有法律。他說：「香港有法律保障，所以都唔差得太遠」。近期政府是否干預得太多？他不置可否。他說：「睇政府政策，要睇多一段時間，唔能夠咁快就批評政府，要公平啲。」他指暫時不感覺到香港政策偏幫境外公司。
過去曾有人指李嘉誠或於香港撤資，他強調自己有得揀，但補充「香港係優先」及自己「真心真意愛香港」。他指集團一直發展香港業務，在港有近4萬員工，佔集團員工近15％。李續指，過去有人妒忌他在港的投資，「以前覺得唔正常，家覺得正常」。現在已會用平常心面對，並指自25年前已於外地投資，但香港的投資一直保持增長，但不會勉強，過去一直都是「如果有人唔鍾意，咪外地投資多啲囉」。
《蘋果》記者
回應佔中立場：冇好答案
佔領中環成為市場熱門話題，商人普遍對佔中搖頭之際，李嘉誠反而未有一口反對。長實總部長江中心位於中環核心區，被問到對「佔領中環」的立場，李嘉誠一聽到「佔領中環」四字，立刻低頭含笑、再脫下眼鏡︰「嘩！呢件嘢呢，我同事講咗（不回答政治問題），我實在呢……喺呢個時候，我冇好好嘅答案。我冇好好嘅答案，去答你呢個問題！」
程志遠攝
■長實業績發佈會上，公關多次阻止記者提問政治題目，但李嘉誠反而樂於回答。程志遠攝 
没有评论:
发表评论