蘋果日報- 護照銀紙不離身 - 左丁山

護照銀紙不離身 - 左丁山

韓亞客機在七月七日三藩市機場發生意外之後，老友活力先生收到空中小姐藍海寧嘅WhatsApp，原來藍小姐當時剛在三藩市機場內，目睹意外，知道有一位中國人拖着行李篋坐緊急滑梯逃生，非常憤怒，指呢位中國人十分缺德，因為行李篋外有拉鏈扣等較尖銳硬物，有可能刺穿滑翔氣墊，令後來者難以滑下逃生。

七月九日「蘋果」報道，呢位中國人原來就係淘寶網主管徐達，佢拖着行李篋逃亡，話因為護照銀紙都在篋內，不能不帶着走喎，呢個可能係真正理由。左丁山每次旅行坐飛機，必定將最重要嘅兩樣嘢護照身份證及銀包，袋在身上，絕不離身，好容易袋啫，出發前穿着一件釣魚用多袋衫（或攝記外套），買件輕嘅，多袋嘅，將必要物件放晒裏面，如遇上意外，立即起身走人，乜行李都話知佢啦，唔見晒就算。最笨一個方法就是把護照錢包放在拖篋，拖篋放於機場，好容易俾職業竊匪偷走㗎。一位朋友到紐約希爾頓check-in之時，在住客登記表上簽完名，向右腳踭一望，魂飛魄散，因為佢將個占士邦喼放在腳旁，喼內有護照與荷包，賊人身手敏捷，就係趁佢抬頭與款待員談話時，幾秒鐘內偷走隻喼，令佢留在紐約兩日，心情煩躁到極！更何況飛機有意外之時，你估實可以及時攬住個喼逃亡嘅咩。

 不過有好多人話將錢與護照放在身上太貼腰胸，好唔舒服，係要放在背囊或孭袋。其實有乜咁唔舒服吖，買件唔好太fit嘅多袋衫咪得囉！

藍海寧又對活力先生講，潮流女性興着人字拖，上飛機亦如此，遇上飛機意外，慎防傷腳。好似韓亞客機咁，飛機內部毀壞八八九九，滿地硬物，其中有玻璃，穿着人字拖逃命，好容易被刺傷、割傷，女士們不可不防！

航機飛行安全率高過汽車安全率，坐飛機其實係幾安全嘅，只是飛機在空中，人在天上，一出事就難救，故此有啲人好怕坐飛機，最嚴重者就係患上飛機恐懼症，例如前阿仙奴球星柏金及今季曼城簽入嘅西班牙翼鋒拿華士。暑假旅遊旺季已經開始，左丁山呢兩日不在香港，希望大家在外玩得安全開心。