近日，接二連三發生手機爆炸事件，上星期就有 iPhone用家充電時，充電器突然爆炸，令到全屋跳大掣，嚇壞老人家。
不想手機變成炸彈？記得睇以下招數，教大家點樣拆彈。
- 手機拆彈
點解會爆？
盧覺強話若見到電池膨脤，就是爆炸先兆，應盡快更換電池。
成日有報導話手機會爆炸，好多人認定雜嘜電池是元兇，原來大錯特錯，據理大機械工程學系工程師盧覺強話，原廠電一樣易爆炸。
「手機鋰電池入面有保護裝置，遇到高溫或漏電，就會自動斷電嚟保護手機；但如果手機運行至超過 36° C，電池內的電解物質就會出現氣化，電池就有機會膨脹，令保護裝置失靈；如果手機運行持續高溫，當達到 60° C，電池就會谷脹至燃燒爆炸。」
盧覺強話如感覺到手機辣手，代表已超過 36° C，應即刻停止用機，或更換電池，避免意外發生。解剖手機
智能手機熱到燙手，相信好多人都試過，令人懷疑手機有無散熱系統。億訊手機維修中心老闆 Wilson話，原來手機只靠機身外殼物料散熱，「手機唔似電腦會裝散熱扇，所以就要靠外殼散熱。不過用膠外殼嘅 Android機，因為膠導熱能力弱，熱力會儲存喺機身入面，散熱能力等同零，所以幫襯得我最多嘅都係 Android用家。」
他又指用手機保護殼都會令熱力焗在機身內，經常出入冷氣地方，機身就更易因溫差出現水氣，令電池漏電，產生火花就會引起爆炸。
試過維修時不小心弄穿已膨脹的手機電池， Wilson話該電池立即冒煙繼而着火，提起都猶有餘悸。
眾多款手機中， Wilson話 iPhone散熱做得最好，全因電池及處理器位置，會安裝鐵片（紅圈）作散熱。
36℃究竟有幾熱？
專家話，手機表面超過 36° C，電池就有失靈風險。究竟 36° C有幾熱？去 Starbucks買杯大杯裝熱 Latte，即買即量度溫度，發現新鮮滾熱辣的紙杯表面有 53.9° C，套上隔熱套就有 36.8° C，都感覺到辣手。
專家話：小心防水機
如果用防水手機，過熱時可否立即放入水降溫？ Wilson話原來好危險，「手機喺高溫情況下，即時放入水中即時冷卻，因溫差太大，會令電池壽命縮短。而且當冷卻後又再即時使用，手機內部可能會出現水氣，亦都會令電池膨脹。」
街訪點熱
究竟街坊點睇手機過熱？今次就帶埋紅外線溫度探測器，訪問之餘測埋手上 gadget溫度。
暖蛋照煲
Panda 19歲 大學生
隨身 gadgets： Sony XPERIA ZR
講陣電話部手機就開始暖，不過通常要『煲』夠半個鐘，熱到辣手先會收線。
壹解話：睇 Panda玩了十零分鐘《 Candy Crush Saga》後，機身溫度竟然上升至約 43度，應即時熄機休息，否則電池好易「打柴」。
Gadgets測溫： Sony XPERIA ZR： 43.7° C
熱爆經驗
Anna 17歲 中六學生
隨身 gadgets： Samsung GALAXY Note II
兩個月前試過部手機冇插住電源，只係擺喺枕頭邊瞓覺，第二朝一拎起部機竟然熱到辣手。即刻拆電降溫，過一陣再開番，竟然冇咗 50%電，完全唔知點解。
壹解話：如果無故耗電發熱，好明顯電池或手機零件出現問題，應盡快檢查。
Gadgets測溫： Samsung GALAXY Note II： 34.3° C
睇片發燒
Jennifer 20歲 大學生
隨身 gadgets： Nokia C1-01、 Apple iPod touch 3rd Gen
平時手機只係用嚟打電話，好少過熱，反而 iPod touch用嚟睇戲，好多時睇唔夠一個鐘就過熱 hang機，試過彈 app，甚至自動熄機，要吹陣冷氣降溫先開得番。
壹解話：冷氣的確可以快速降溫，但一走出冷氣房好易出現水氣，更易整壞機。
Gadgets測溫： iPod Touch 3rd Gen： 33.4° C
手機溫度你要知
日日都要用手機，等同拎住個炸彈，揀錯機認真危險。其實應該點揀？今期搵幾部熱賣手機，進行熱度測試，試完你就知邊部最危險。
Test 1：睇片測試
測試時下六款最熱賣的手機，比較不同用法下的溫度。
測試方式：室溫下用手機連接 Wi-Fi，睇一個鐘 YouTube影片，之後用紅外線溫度探測器測試機面及機背溫度。
識揀物料
測試溫度計提供：新科儀器
睇 YouTube要長期下載數據、解碼同開着屏幕，可以話谷盡手機硬件運作，自然最易產生熱力。測試完 Sony XPERIA Z Ultra、 Samsung GALAXY S4、 new HTC One、 HTC Butterfly s、 Huawei Ascend P6及 iPhone 5六部手機，其中以國產手機 Huawei Ascend P6的溫度最高，機面有 37.1° C，機背更高達 40.4° C，連機側金屬框都輕微燙手。
至於可以換電膠殼機 Samsung GALAXY S4明顯比不能換電膠殼機 HTC Butterfly s低溫，主要因為前者於機內預留更多空間拆殼，有助散熱，表現都算合格。不過，想部機更低溫，就最好揀金屬殼機（ new HTC One）、金屬框＋玻璃底殼（ iPhone 5），物料比起膠更易散熱；而大芒機（ Sony XPERIA Z Ultra）因為機身面積大，與空氣接觸面較多，溫度亦會較低。專家話：切勿過夜充電
智能手機耗電快，好多人都會充電充過夜，確保第二日夠電用。盧覺強工程師警告過夜充電實際是搵命搏，因為電池過分充電，會造成電壓不穩，嚴重至漏電產生火花，若手機放在床上被床單、被單蓋着，更易起火。他提醒除了靠家中電箱的保險絲截斷漏電外，亦可以花約一千元，聘請合資格水電師傅，在電箱旁額外加裝一個更敏感的漏電斷路器，當遇到漏電或電壓有異常，斷路器會主動切斷電源，為家居安全買多重保險。
Test 2：機殼測試
測試方式：在室溫下為 Samsung S4安裝不同機殼，同時連接 Wi-Fi及試玩賽車 game《 Real Racing 3》半個鐘，之後用紅外線溫度探測器測試機背溫度。
熱到 hang機
裝機套好多時會阻礙散熱，不過安裝金屬殼後，機背溫度未有超過 40° C。其餘硬膠殼、軟膠殼及有蓋仿皮套則全部超標，其中軟膠殼同有蓋仿皮套的溫度都接近 44° C，隔住套都感受到機背熱力，打機中途更因過熱 hang機。如果用硬膠殼、軟膠殼及有蓋仿皮套，下次打機前記得拆殼。
Test 3：打機測試
測試方式：室溫下用 HTC Butterfly s連接 Wi-Fi，試玩 online game《重裝武士繁體版》半個鐘，之後用紅外線溫度探測器測試機面及機背溫度。
高危一族
不單只睇片會熱，打 online game一樣會用盡硬件運算能力。用四核心膠殼機 HTC Butterfly s試玩半個鐘《重裝武士繁體版》，機面溫度已達 40° C，機背溫度更高達 41.5° C，超過影響電池的臨界溫度，如果長時間打機，一定令電池溫度超標。
Test 4：充電睇片測試
機面： 32.7° C
測試方式：室溫下用 iPhone 5連接 mophie機殼形外置充電器，同時連接 Wi-Fi睇 YouTube影片半個鐘，之後用紅外線溫度探測器測試機面及機背溫度。
未算太熱
機底： 31.8° C
專家話插住火牛睇片最易出事，如果改用外置充電器，因為電壓會跟隨外置電池電量下降，所以長插出事風險較低。測試的充電機殼對比無用機殼，機面溫度只是高出約 1° C，而機背溫度甚至比無用殼低 0.3° C，主要因為機殼形外置充電器同機背之間留有散熱位降溫，下次揀機殼形充電器時可留意，或直接買「尿袋」都得，只是要駁線，較麻煩。
家居危機
手機長開易過熱，屋企的電器例如機頂盒、路由器亦會全日長開，早出晚歸好易出事。想知屋企邊種電器最熱？試過你就知。
家居電器測試
測試方式：室溫下開啟及運行要測試的家電一個鐘，之後用紅外線溫度探測器測試機身最熱位置溫度。
機頂盒最熱
大型家電由於體積大，機身內的散熱空間頗充足，所以測試時都未有超標。反而要留心體積細的電器，好似機頂盒（小米盒子），機身內零件、電線擺位精密，未必有足夠散熱功能，測試時機面溫度高達 60° C，絕對是高危電器。
至於 Wi-Fi路由器（ Apple AirPort Time Capsule）的機面溫度大約維持 45° C以上，如果有大量數據存取，好似串流睇片或 BT下載等，溫度更高達 50° C，掂一掂都燙手。放置時記得在上下預留空間散熱，出門時亦最好拔除插頭，先夠安全。
只要在 Facebook以「 NEXT 3.0」為關鍵詞搜尋，或以手機的「 QR code」 app掃描，就可以睇到更多新聞同產品情報。
軟硬消暑
手機過熱隨時爆，應該學定幾式救火招傍身，為手機降溫。
除非就住用，否則智能手機一定過熱，不如學識降溫招數，就可用得放心。
硬解暑
用 Samsung S4邊充電邊玩半個鐘賽車遊戲《 Fast Racing》，測出手機表面溫度約 38.5° C，再貼不同物料於手機電池上並繼續打機，比較前後溫度變化。
第一招：電腦散熱貼
使用方法：去電腦維修鋪買電腦處理器專用散熱貼（約$5/4張），貼完明顯為電池降到溫。
測試結果：減 4° C
最降溫
第二招：薄銅片
使用方法：金屬原理上有助降溫，於五金鋪購買銅片貼（$16/1碼），但效果不明顯，只降低約 1° C。
測試結果：減 1° C
無作用
第三招：退熱貼
效果一般
使用方法：將退熱貼（約$30/6塊）剪細再貼上電池，發現溫度好快降至 35.2° C，效果不過不失。
測試結果：減 3.3° C軟降溫
手機爆炸，好多時因為電池過熱引致，尤其當手機充電或連續長時間使用，手機分分鐘熱到辣手。安裝電池監測 apps，自動關掉待用 apps或控制硬件工作量，減低熱爆風險。
背後發功
好多時背後運作 apps最為耗電，「金山電池醫生」會將待機中的 apps關閉，減輕處理器負荷。可設定自動轉換手機模式，例如夜晚十一時後自動開啟飛行模式或關閉數據，確保第二朝瞓醒，電量都不會突然大減。
支援機種： iOS、 Android
搵出背後運行的 apps，然後自動關閉以慳電。
電池圖解
睇名都知，「 Battery Widget」會以 widget形式顯示電池狀態，並以不同顏色顯示剩餘電量。最有用是提供詳細圖表，一次過顯示電量、電池溫度及電壓，不用靠手摸。
支援機種： Android
圖表可以睇到每十分鐘的變化
搶眼咪錶
雖然 iOS無得裝 widget，睇電量方便程度稍為輸蝕，不過「 Battery Life」都有靚爆汽車咪錶介面補救。功能亦相當實用，會自動計算不同用途下電池剩餘的使用時間，仲可以同時控制 Wi-Fi、藍牙同 push mail開關，輕鬆控制處理器工作量。
支援機種： iOS
共有七款咪錶設計，保持新鮮感。
冷凍新技
散熱手機
日本 NEC的 MEDIAS X N-06E手機內藏水冷系統，處理器旁邊有條液體導管，負責將熱力引至機頂石墨散熱片降溫。真機測試，連續播片一個鐘，溫度只有 35° C，比其他 smartphone低幾度！
售價：$4,580
網址： http://www.3siu.com
睇官方拆解圖，就知散熱原理在於將熱力帶離處理器，令熱力不會過分集中。
識得自行散熱降溫，的確夠創新。
風扇做到如紙薄， notebook入面裝多幾把都得。
超薄風扇
通用電器工程師將用來冷卻超音速飛機引擎的 dual piezoelectric技術，放落 notebook中取代傳統散熱風扇。風扇只厚 3mm，但仍能提升散熱效能，有機會連 smartphone都擺得入。
網址： http://www.gereports.com/here-come-the-cool-jets
藍色水管運入凍水，然後經紅色水管運走暖水。
數據熱
數據中心伺服器運算量大，更要諗辦法降溫。其中 Google建於芬蘭灣海旁的數據中心最成功，將北冰洋的冰水抽入水管，途經伺服器房幫手降溫，海水變暖後會被送到另一房間，利用特製物料將熱水迅速冷卻，再循環回到伺服器房使用，認真環保。
網址： http://www.google.com/about/datacenters
燈膽之間有一條條管道，讓液體流過。
涼燈膽
LED燈膽成日俾人話易壞，其實多數因為過熱而燒壞電路板。 SWITCH發明「水冷燈膽」，利用液體降溫，比傳統用空氣降溫的 LED燈膽低溫 40%，有效延長燈膽壽命。
網址： http://www.switchlightingco.com
text：科技組
photo：攝影組
没有评论:
发表评论