買美國房產 - 左丁山
基金A移民三藩市近二十年，住在金門橋彼岸一間獨立花園洋房，離海邊不遠，相等於香港之南區，故此屋價有升無跌；不過此日基金A在左丁山寫字樓講：「𠵱家想搬返嚟都唔得，我今朝睇報紙，黃大仙區樓價仲貴過三藩市中心區樓價，我間屋雖然話升值不少，但以呎價計番港紙，只係六千幾蚊一呎，有鬼用咩，你行上蘇豪區望吓，我一個所謂豪宅單位都買唔到！」想落又係，前幾日太古地產在西摩道63號現貨樓盤「珒然」，招待傳媒參觀，左丁山上到去，陶傑亦在，陶傑話：「我哋買唔到一個廁所噃！」陶傑好謙箒，不過問吓價錢，35樓（一梯一層一伙）擁無敵海景，大約售價九千四百萬元（左丁山憑記憶，應以太古地產價單數字為準，記憶有錯嘅話，監管機構請勿怪罪太古地產！）相等於實用面積三萬餘元一呎，買得起基金A間花園大屋有餘。
基金A話三藩市灣區地產有價有市，由中國買家帶旺晒，中國買家之故事，千奇百怪，益晒一啲華裔地產經紀，譬如一位買家買屋，居然落咗一個股票式柯打GTC（Good Till Cancelled），擺低二百萬美元入代理公司之客戶信託戶口，在Palo Alto買屋，等到一有即買。唔使睇樓嘅咩？中國客話：「Google咪睇到囉！」幾先進呀！又有另外一位經紀接到柯打，以預算二百八十萬美元買屋，經紀搵到一間叫價180萬美元嘅，但客人話：「我嘅預算係280萬，就計280萬啦！」經紀不明所以，不知其邏輯何在，居然為此講到動氣，因經紀驚俾賣家指控食價之類。
以香港價錢計，美國樓價真便宜。曼赫頓之Chase Manhattan Plaza位處市中心靚區，最近賣咗俾上海復星，售價七億二千五百萬美元，以樓面面積二百二十萬平方呎計，呎價係港紙二千五百五十元左右，大概相等於律師T在1989年買入德輔道中古老寫字樓嘅價錢，平到不可思議。不過基金A話地契或有特別條款，外人唔會知道，唔通原來業主JP摩根大通係儍仔咩！1980年代中，日本經濟興旺，地產價格大升，日本號稱世界No. 1不可一世，日本人大舉進軍曼赫頓、三藩市、洛杉磯、夏威夷等地，買入曼赫頓地標Rockefeller Centre，名震一時，但日本泡沫爆破後，以一半價錢賣番俾以高盛為首嘅美國基金投資者。30年前之日本人難道就是今天的中國人？因為「他朝君體也相同」噃。
没有评论:
发表评论