隱婚三年苦不堪言
鄭中基阿Sa冇出過街
■倪匡笑說將鄭中基的隱婚經過寫成書也沒有人信。攝影：黃永俊
【亂噏24 第17集】上回谷德昭被黎智英（肥佬黎）追問感情事，弄致滿頭大汗，今回輪到鄭中基（Ronald）在蔡瀾和倪匡左右夾攻下，和盤托出與蔡卓妍（阿Sa）隱婚三年的真相。《亂噏24》足本版逢周四晚上11時播出，可在http://bit.ly/appletalk24
重溫。
撰文：馮國康、Sidekick看過梁詠琪任嘉賓的一集《亂噏24》，都會記得蔡瀾說過的「發上等願，結中等緣，享下等福」，大抵肥谷也看了該集，對這人生格言甚為欣賞，尤當看見眼前三位主持老友鬼鬼，份外覺得羨慕。蔡瀾認為懂得珍惜及原諒對方的缺點，身邊便會有很多朋友，他說：「有啲人專搵人哋缺點，嗰啲人冇朋友。」原以為倪匡和肥佬黎都愛廣結良友，誰知兩人異口同聲表示朋友不多，「十隻手指數得晒」，肥佬黎說：「我覺得唔係咁需要，可能有家庭啦。」
人說凡有利益衝突的都做不成朋友，肥佬黎對此並不同意，他回想幾十年前曾與他有利益關係的人，今日依然是好朋友：「我後生時同兩個鬼佬做partner，大家都好主觀，插到唔清唔楚，插咗四十幾年，家仲係好好朋友。」說到底，做朋友最緊要誠信，他續說：「就算我哋插餐懵，大家都係好老實。唔老實，夫婦都冇得做啦！」蔡瀾靈光一閃，突然將話題扯到Ronald上，只見三位主持陰陰嘴笑，倒是Ronald一臉錯愕：「喂，你哋講緊乜？」當得知蔡瀾說的原來是他與阿Sa隱婚一事，才恍然大悟，並指着肥佬黎說：「咪就係俾你哋踢爆囉！」
■鄭中基和阿Sa於2010年舉行記者會，同日交代已婚及離婚。資料圖片
Ronald被三主持人追問當日隱婚經過，只得坦白從寬。先是蔡瀾問：「第一件事，點解冇人發現嗰張結婚證書？」Ronald答：「我特登揀墨西哥區註冊。」倪匡續問：「點會冇人懷疑呢？兩夫婦共出共入㗎嘛！」Ronald答：「有，但唔多，都係家庭聚會多。親密朋友都知嘅，冇講啫。」
眾人對Ronald佩服得五體投地，但其實他有苦自知：「我哋幾年都冇出過街㗎，一係就出埠，但都係前後腳。」最慘出街發現狗仔隊，為避開鏡頭要躲在車底，甚至試過瞓車尾箱，回想起來都覺得辛苦。肥佬黎問他是否抑壓得久，將搞笑一面逼出來？Ronald不太清楚，但認為此事令他變得浪漫，因每次見面都要度橋：「當一個遊戲，所以日日都要諗新嘢。」「Sa基戀」失敗告終，肥佬黎語重心長的問Ronald：「你望番轉頭，覺唔覺呢單嘢好戇居？」Ronald答：「都好戇居。冇㗎喇，一次㗎咋！」肥谷認有女友
這邊廂Ronald剛被盤問完，還未及回氣，那邊廂到肥谷被狙擊。肥佬黎說：「谷德昭會唔會諗住結婚呢？」肥谷沉思：「結婚呀？」肥佬黎打斷他：「你有冇女先家？」肥谷答：「有嘅，有嘅。屋企人知囉，冇乜需要畀其他人知吖。」肥佬黎即發揮搞笑本色，對着鏡頭說：「喂啲狗仔隊大佬真係，要跑先得喎，你班友仔！你搵唔到佢女朋友係邊個，真係炒得㗎喎！好自為之啦！」當真隔着畫面都感受到那份威嚴。肥谷似在懇求肥佬黎手下留情：「冇乜需要搞佢啦，我又冇乜呢個價值，又唔會開記者招待會。」老實說，林子萱默默守護肥谷九年了，也是時候得到名份吧！
■鄭中基拆解當日隱婚生活，有如跟狗仔隊玩捉迷藏。
■鄭中基現與余思敏婚姻生活美滿。資料圖片
■肥谷和鄭中基十分羨幕三位主持多年來老友鬼鬼，名副其實「結中等緣」。
說完一輪感情事，眾人又回到較soft話題。眾所周知肥谷是著名喜劇編劇，星爺的《唐伯虎點秋香》、《大內密探零零發》及《食神》都出自他手，不過近年因要照顧內地市場，刻意滲進北方笑料，結果吃力不討好，他說：「原來我哋扮唔到北方人，扮唔緊要呀，最老套係俾人發現我扮！」他發現南、北的文化差異很大：「佢哋真心睇你唔起！」身為編劇高手的倪匡認為拍一套純廣東話的電影，北方人反而會接受。
無綫劇常被批評馬虎，跟外國的嚴謹相形見絀。肥谷提到英美劇如《Little Britain》、《Saturday Night Live》等都有編劇團隊，他說：「我睇過一個特輯講《Saturday Night Live》，開會大家throw橋，好強競爭性。」
倪匡也是著名編劇，其文字可以天馬行空，但電影情節始終要符合邏輯才令人信服，他曾編寫一齣民初劇，想極也想不通拳腳怎對付槍械，事後才醒起其實很簡單：「打唔中咪得囉！三十幾支機關槍打班女兵，打極唔中，班女兵攞支箭出嚟一射一個，一射一個，哈哈！」倪匡笑說徐克電影最瘋狂：「一個炮彈打去，嗰個人飛出嚟攬住個炮彈，呢個世界咁都可以，哈哈！我睇到呢個鏡頭真係佩服到五體投地。」倪匡拳擊李小龍
倪匡記得有次李小龍找他寫劇本，誤以為他不肯寫而作勢打他，他憶述說：「何冠昌先生話唔好打呀，倪匡玻璃嚟，唔掂得！」李小龍反叫倪匡出力打他三拳，倪匡照打如儀，感覺就如打木板一樣：「佢就好得意嘞，見到我手痛。又話倪太你都打我三拳啦，連我老婆都打過李小龍三拳，諗起都好威水呢。」
倪匡眼裏的李小龍，跟一般人沒大分別，也有懦弱時候，當年兩人出席《精武門》首映（倪匡是編劇），他還拖着李小龍的手，倪匡說：「佢好緊張，標冷汗呀，問會唔會有人唔鍾意我，我話點會有人唔鍾意。後尾大家知道李小龍喺樓上（樓座），下面啲人全部湧去前座睇佢。佢問我點呀，我咪話你好似希特拉咁（打招呼）囉！」原來已是四十多年前的事了。港文化水平插水 副刊勁多火星文
http://bit.ly/talk241701
學友醉駕喪嘔 嚇到Ronald冇氣唞
http://bit.ly/talk241702
做人最忌誠信差 維繫利益耍手段
http://bit.ly/talk241703
當狗仔隊冇到 Ronald秘娶阿Sa靠食腦
http://bit.ly/talk241704
港編劇刻意獻媚 慘被北方人睇唔起
http://bit.ly/talk241705
踢爆肥谷戀情 肥佬黎親自落柯打
http://bit.ly/talk241706
拳鬥槍械咁都得？ 香港編劇冇邏輯
http://bit.ly/talk241707
《精武門》首映標冷汗 李小龍硬食倪匡三鎚
http://bit.ly/talk241708
想尋死一了百了 抑鬱病唔講得笑
http://bit.ly/talk241709
谷德昭歎群眾印象 害苦思覺失調患者
http://bit.ly/talk241710
■倪匡笑說將鄭中基的隱婚經過寫成書也沒有人信。攝影：黃永俊 
■鄭中基和阿Sa於2010年舉行記者會，同日交代已婚及離婚。資料圖片 
■鄭中基拆解當日隱婚生活，有如跟狗仔隊玩捉迷藏。 
■鄭中基現與余思敏婚姻生活美滿。資料圖片 
■肥谷和鄭中基十分羨幕三位主持多年來老友鬼鬼，名副其實「結中等緣」。 
■（左起）鄭中基、倪匡、肥谷一見面就談過不停。 
没有评论:
发表评论