肥仔K愛食拉麵，以前喺東京已揸住本東京拉麵全攻略到處行，返港後，若知道邊度有靚拉麵嘅話，就去排隊，以前佐敦站恒豐中心地庫有條拉麵街，不少麵舖打正日本招牌經營，肥仔K話有幾家幾好食，點知不知何故，條「拉麵街」食店好快就改成香港招牌，水準亦由日本式改為港式。在香港想搞起一個概念，成行成市嘅話，因鋪租貴，工人難請難留，港人口味多變，又真係有困難嘅。譬如同一招牌嘅拉麵，同埋老闆，肥仔K去威靈頓街嗰間排隊，食完就話有日本風味，唔怪得每日由十一時半至二時，晚上六時起，呢間拉麵店門口就排晒隊，但另外兩間分店呢？一般啫，肥仔K食完新城市廣場嗰間，就話以後可以慳番。
以前銅鑼灣有間MIST ，肥仔K話係百分百日本風味，值得推薦，不過呢，唔知係唔係日本食材貴，銅鑼灣鋪租貴之故，呢間曾經叫好叫座嘅高級拉麵店，已經結業，對一啲高端食客嚟講，未免可惜。
與MIST 同系嘅rasupermen為求多元經營，除堂食之外仲推出無味精（日本食物無味精，都幾新奇）外賣拉麵，希望可以增加收入。公關大姐大試食之後，順手送兩包俾左丁山，於是在上星期日上午，當作早餐食，叫埋肥仔K夫婦，小YY夫婦過嚟試味，要肥仔K呢位半個拉麵專家品評。一包有機半熟雞蛋撈麵，一包叉燒拉麵，六個人食，係咁意試吓，各人同時讚好，肥仔K點頭話好唔錯，值得當午餐食。
大姐大話8月30日至9月8日，將軍澳廣場有一個「同樂迎中秋」節目，rasupermen訂咗一個E1攤位，現場發售五款口味嘅拉麵盒，盒內就有烹調說明。將軍澳離左家甚遠，點去趁墟呀，原來亦可以打電話去訂貨嘅。
肥仔K食完外賣拉麵，叫好之餘，提議去鴨巴甸街（即《蘋果日報》出埋肥佬黎相片推介嗰間）食天婦羅，嘩大熱天時，行上鴨巴甸街，身水身汗，冇位嘅話，咪好冇癮？叫肥仔K打電話去問吓先，一問，就唔駛去啦，午食要訂到個幾月之後至有位，晚餐更加要等到12月！呢間天婦羅店一開業就有城中名人捧場，唐英年林建岳兩位著名食家立即幫襯，店內晚晚坐滿城中知名人士（滿晒都係12位）晚市平均消費$1,200（一人前），肥仔K話咁就冇資格去食咯，得個望字！
HH
没有评论:
发表评论