總是東向西流 - 左丁山
1989年之前，世界壁壘分明，以蘇聯為首的共產主義／社會主義國家，與美國為首的西方民主選舉／資本主義國家對抗，是為冷戰時代。當年有不少人士逃亡，逃離自己國家，投向對方陣營，而99.99%逃亡人士係由東方走向西方，由古巴逃往美國，由中國大陸逃來香港，由越南坐船投奔怒海、逃往東南亞、澳洲，最終目的地就係美國。
冷戰年代人民用腳投票，冒生命危險，坐艇、游水、攀山、爬牆，以驚人意志爭取自由生活。今日係21世紀咯噃，共產／社會主義陣營幾近解體、北韓無人理會、中國實行具有中國特色的社會主義，以施永青嘅講法（十二月十六日am730），即係資本主義橫行，中國有大量人富起來，俄羅斯方式資本主義產生大量億萬富豪，既然祖國咁好搵，冇人肯做「難民」，逃離祖國嘞啩？哈，富起來了，不用逃亡，不做難民，就改做移民，到倫敦買大屋，到紐約買名廈，順帶「買」埋英國、美國、澳洲永久居留權，跟住搞埋仔女移民。一位歐洲移民代理話：「俄羅斯、東歐、中國啲有錢人係要追求第二選項、追求資產分散、追求更好教育制度，所以追求多兩三本護照，十分自然。」
在俄羅斯、中國搵錢發達，到英美澳加安家立室，已成為中俄億萬富豪嘅真理，既然如此，做乜英美等國家笨得咁緊要，唔索性印護照賣錢，明買明賣好過搞甚麼「投資移民」，谷高樓價，益咗地產商，苦了本國中產吖。LSE一位榮休教授David Metcalf，係英國移民諮詢委員會主席，就主張廢除甚麼假惺惺移民投資計劃，索性老老實實咁公開拍賣移民簽證，價高者得，讓市場需求決定英國居留權嘅價格，拍賣所得直入政府庫房，收入會相當可觀，況且外來移民買到簽證之後，咪又一定在倫敦買樓，呢個做法，保證有錢人先至入到英國，唔會有人移居英國跟住伸手攞福利！呢個方法，目前一定受社工界、政界反對，英國政府唔敢實行，但如果真係實施，對陳佐洱、張榮順等人可能有啟蒙作用，「啟蒙」佢地呢類人思考點解中國大富翁爭相移民外國，全無國家民族觀念。佢地開竅嘞，先至再思考一國兩制教育都未遲。
I
没有评论:
发表评论