COVER STAR
時尚界去年最有趣短片話題，非《Vogue》推出的「73 Questions」莫屬，訪問以快問快答的形式，向碧咸、Anna Wintour及一眾荷李活女星狂問七十三條問題（當然有綵排過），從中了解她／他的品味、取向。養尊處優的「玉女掌門人」周慧敏（Vivian），近期為福音碟出動宣傳，凍齡不老的Vivian今年四十七歲，我們向她問了四十七個問題，宗教、福音以外，屬於周慧敏的一些小事。
Balenciaga白色cutout上衣、Tod's白色長裙、Jimmy Choo銀色platform涼鞋
撰文：林妙萍
攝影：周樂恆
造型：顏英儀
髮型：Abby of HAiR
化妝：Gricha
Versace白色連身短裙 Lanvin珍珠choker
1.今朝幾點起身？
十一點。
2.早餐食咗乜嘢？
咖啡卷。
3.如果可以令一個人信教，會係？
古巨基！
4.福音碟中最感動嘅歌？
《A LOVE LIKE THIS》。
5.用三個字定義「玉女」
三個字……自愛，仲有兩個字，溫婉、正氣。
6.最怕人叫你嘅稱呼係？
最怕，唔……女神。
7.如果可以活喺過去，你想生喺邊個年代？
我媽咪嘅年代。
8.二○一五年最怕嘅一件事？
病。
9.重聽自己邊一首歌會起雞皮？
《最愛》。
10.人生至今最大成就
可以成為神嘅僕人。
11.衣櫃內最舊一件衫？
我老公（倪震）以前送畀我嘅一件冷衫，好cute嘅冷衫，到今年都仲有着，係七彩嘅。
12.五官最唔滿意地方？
冇，全部都係阿媽送嘅，即使唔係太美觀，都滿意！
13.最滿意？
眼睛。
14.如果唔住香港，會住邊一個城市？
溫哥華。
15.畀你一種超能力，會係……
醫治能力。
16.一個字形容倪震
四A！
17.點解？
因為佢係好爸爸、好老公、好兒子同好老闆。
18.一個字形容古巨基
蜘蛛俠。
19.點解？
因為佢平時好靜，但變身之後可以好勁。
20. G.E.M.定王菀之
唔……王菀之！因為我同Ivana合作過，一定揀佢；第二係，因為我唔識G.E.M.，但我對佢都有興趣。
21.想去但未去嘅國家
印度。
22.聖經中最愛金句
We love because he first loved us.
23.噚晚嘅晚餐
等我諗下先……越南粉卷。
24.火燭逃生時，只可以拎一樣嘢
手機。
25.每次聽都會想喊嘅一句話
冇喎！
26.你覺得一九八五年新秀，自己應該拎第幾名？
唔應該有名次，點解？因為唔得囉。
27.《等一個人咖啡》等人，還是被等？
被等。
28.有冇睇過《100毛》？
冇。
29.點名一個你眼中嘅玉女明星
周慧敏，唔好煩，自己認咗佢算數，唔好麻煩人哋。
30.死前想完成的一件事
無可能㗎喎，我想自己化嗰個妝（死人妝）。
31.日出還是日落
日出。
32.想同黎智英講的一句說話
多謝你咁錫我老爺（倪匡）！
33.你係咪一個慳妹？
唔係！
34.有乜嘢事可以令你剪短頭髮？
隨時都得㗎，只係髮型師阻止我。
35.上星期買過嘅一件衫
係一條網購嘅白色裙，買完之後，佢哋話似護士裙……
36.家睇緊乜嘢書？
聖經。
37.咩食物可以令你瘦？
平日如果我只係食菜加魚，係會令我好快瘦。
38.有邊一個角色想重演？
冇。
39.女人唔能夠做嘅一件事
壞女人！
40.至今有成功感嘅一件事
好開心，做完《HIM》專輯。
41.最幸福嘅年份
二○一五啦，家。
42.有冇試過一Ｑ清袋？
有，試過兩次。
43.作詩難，還是畫畫難？
詩難啲。
44.生細路還是出多一張碟？
出多一張碟，唔想生小孩！
45.上一次同倪震嘈交係幾時？
太耐喇，耐到記唔起，真係好少嘈交。
46.怕不怕「五十歲」呢這個字？
一啲都唔怕，因為就快到喇。
47.最後一題，凍齡還是優雅老去？
優雅老去，因為凍齡太可怕喇。
九七後的首張專輯
能令周慧敏事隔十七年再出一張新唱片，自己監製、作曲、作詞、唱片概念，《HIM》專輯全部由她親力親為，只因是信仰力量。「我都冇諗過會十幾年後再出 碟，信仰係我最大嘅動力去做，令我願意行出自己嘅comfort zone去做。」她在二○○九年接觸基督教，翌年受洗，信教後令她價值觀大改變，影響身邊人，連九十一歲母親，也在她的見證下受洗。她希望以流行曲的曲 式，融入福音道理傳道，「我好熟悉流行音樂，音樂嘅感染力很強，再加上語言，係非常powerful。以往我係好專注去做歌手嗰part就OK，成張碟係 造就個歌手本人。但做呢張碟，個名係《HIM》，好明顯我唔係主角，兼顧的工作，heavy好多。
I
没有评论:
发表评论