貪腐國情 - 左丁山
一位朋友受公司調配，到內地分公司查視賬目。好容易就搵到一啲中層幹部涉嫌挪用公款，亂咁開單申領公費應酬嘅情況，心諗內地官方反貪腐雷厲風行，冇理由香港企業要對公司內部嘅情況，視而不見嘅啫，雖然涉及費用唔係好大，都係要整治下，於是搵一個違規情況較嚴重嘅，炒之哉，以為可以殺一儆百。哈，點知跟住佢嘅公司CEO就收到內地公司「一群愛護公司員工」嘅匿名信，指朋友不懂國情，破壞職員與官方部門建立嘅友好關係，打擊員工積極性，導致訂單流失，要求CEO正視，調走朋友。CEO當然頭痛，佢明白到「香港價值」必須堅持，否則企業難以持續性發展，但又知道內地國情如此，唔照內地「搞好關係」之遊戲規則玩，好易寸步難行。點算好？
肥仔K有個日本同學在日本大企業打工，不時到中國與客戶聯絡，返到東京就寫匯報。肥仔K問同學如何應付內地之「搞關係，拉關係」？同學話：「我地日本人與中國同事開會，講到應酬拉關係之時，我地通常借故離席，唔知中國同事講乜做乜㗎！」咁即係搵定藉口，他日發生事故，日本人就有得賴，話自己唔知嘅啫！但若然如此，一旦出事，企業本身始終難逃股東及公眾責難。
中國股市在夏季大冧之初，中證監按慣例，諉過外資大鱷，點知查查吓，原來冚扮爛係內地地下錢莊、銀行、企業、基金互相勾結，大搞內幕交易，捧高踩低，從中圖利，於是最近嚴查內銀、內券商，以至私募基金，拘捕有私募一哥之稱嘅徐翔，證監會主席助理較早前落網，中信證券高層自殺，更有東風汽車集團高層、南方航空副書記、董事長被查，總之一塌糊塗，可見中國官商勾結，無處不貪，難怪連普通港資企業之內地分支嘅中層幹部都將吃喝玩樂開公數，視作等閒事。中國最高金融機構中國人民銀行做事亦不嚴謹，好似十一月四日人行網站發表周小川文章講今年開通「深港通」，即時觸發股市暴升，港股最高升咗七百幾點，但好快人行就澄清，篇文章只不過係周小川在今年5月時股災前嘅講話，於是港股升幅立即收窄。人行分明誤導群眾，誤導股市，不排除有春江鴨因此得大利，香港人今天炒股，基本上受制於內地消息，唔怪得過往徐翔等人可以大發特發，成為股神，香港股民就成為人地嘅點心。
I
没有评论:
发表评论