2016年1月23日星期六

2個港鐵站的戀愛 - 曾志豪

計「肯捱麥記」，港男又一擇偶新條件：「與你相隔半小時車程」。香港男人幾時變得如此弱不禁風，連搵女友都嫌遠？

我可以用過來人身份分享經驗。想當年，仲讀緊大學，無收入無私家車，我同女朋友亦係長途戀愛。有幾遠？我住青衣，女方住鰂魚涌；的確，不是荃灣VS柴灣般一頭一尾，但我無錢住喺青衣機鐵站附近，我要喺機鐵站轉車才能歸家，而女朋友亦要由鰂魚涌地鐵站行十分鐘才能回巢。呢個距離，絕對係愛情長征。

拍拖開始，幾乎係風雨不改、日復一日咁樣，送佢去鰂魚涌，然後形單隻影踏上歸途。我已經忘記趕尾班車的感覺了，反正覺得就像灰姑娘，不停看錶，如果錯過尾班列車，便要展開更偉大的轉車大作戰。坐小巴出銅鑼灣，再由銅鑼灣坐小巴到旺角，再由旺角坐通宵巴士回青衣老家……

我有無怨言？一開始蜜月期，簡直無怨無悔，愛情令人盲目。

當時覺得香港盜賊四起、烽火連天，任由女朋友一個人返家，簡直是送羊入虎口，隨時被人擄劫；卻忘記了其實女朋友未認識你之前，十幾年都是一個人行這條路歸家……

但有危便有機，你可以利用這個長途路程作為完美借口：咁夜，不如今晚喺你度瞓。

這個理由，光明正大、情理兼備，當年我以此，登堂入室，在女友家過夜。

長距離戀愛其實會加強兩個人同居的動力，因為女方也理解男人回家的痛苦（如果女方真心愛你，而不是視你為兵），她也想讓你宿一宵，但土地供應問題，無法做到。這時女方便會萌生離家築愛巢的念頭。恭喜你進入同居時代。

今之港男，只懂抱怨，不思進取，不懂利用長距離優勢達到拉近2人距離的方法。

嫌遠只是表徵，當感情變得平淡，太子愛上油麻地都會覺得麻煩。