【汽車籽】開箱王偕妻東京自駕遊 難忘驚險停隧道口避雪
【汽車籽：軸心人物】
「重拾電單車樂趣六年，好愛！」有幾愛？擁有52部電單車的尤民耀（Henry）於電單車界無人不識，每逢有新啡呤車抵港必第一個購入，每遇到經典二衝程車必儲，故有「開箱王」及「二衝王」稱號。連頭盔、戰衣都愛儲，每架車要襯番一套，若細數家珍，只怕一日一夜說不完。
兩公婆非常恩愛，Henry揀了部Kawasaki Z125給太太May，因為易操控。
閒時在大帽山走一轉，入彎都照磨膝蓋，對駕駛充滿信心的Henry，唯一擔心是對面線車失控殃及池魚。
去年東京自駕遊，途中遇上大雪，車隊要在隧道口避風雪。
兒子不算熱衷電單車，這部三輪Can-am Spyder RS-S買回來給太太同仔仔玩。
Henry玩過不少跑車，這部拉利現在被投閒置散。
訪問途中，Henry的親切落力，令人容易感受到他那種快樂，相信亦容易感染身邊人。經常笑咪咪的太太May對於這個車癡老公的看法：「冇辦法啦，也要接受，佢對啲車真係好真心！好似今朝我幫手推車，隻玉鈪輕輕碰到部車，佢即刻叫我走開，話我隻鈪整花部車。」May現在間中會揸吓電單車，陪老公一齊玩，Henry專登買架Kawasaki Z125給她，勝在車身細、半自動波易操控。May說：「我記性差又論盡，揸得唔叻，佢經常講人車合一，都唔知點合一，我未到呢個境界啩，咪唔叻囉。不過呢部Z125真係好易揸，似踩單車咁。」
兩公婆不時約一班車友去外地自駕遊，台灣、泰國、日本等地也留下足迹。說到最難忘，是一次東京自駕遊，「駕駛途中突然落雪，車隊要停在隧道口避雪，後來驚動日本警方，話我哋嘅位置好危險，就帶我哋去避車處放低啲車，等第二日停雪先返上山攞車。呢次雪地上揸電單車又冇雪軚裝備，真係經典又驚險。」投夫所好分享幸福小故事，May還說了一件往事：「有一日Henry忘記帶電話，我落嚟停車場想叫佢上樓食飯，我嚇呆了，問點解有咁多電單車？我知佢玩車，但一直以為得一架。點知佢答：『啲朋友放喺我度，你睇啲朋友幾信我！』過了幾日我又問佢，朋友幾時攞番啲車？點知佢又話：『哎呀，人哋冇地方放呀，所以咪叫我買囉，不過啲車未過戶㗎。』當時我知根本就係呃我。」以上對白，相信不少老婆都應該好有共鳴。
記者：許維雅
攝影：許先煜
編輯：謝慧珊
美術：楊永昌
部份圖片由受訪者提供
上一則: 【汽車籽】新啡呤必買 二衝車必儲 開箱王擁52部鐵騎
下一則: 寮國和「老撾」 - 陶傑
I
没有评论:
发表评论