時事太沉重 - 左丁山
馬匹「一片光明」狀態大勇
退休高人突然來電搵左丁山飲下午茶，本想唔去，但對方曾長期資助，幫助中大不遺餘力，一定要俾面啫。老人家非常準時，還有半小時先至到約會時間，佢已經打電話嚟：「喂，Harvey Nichols 四樓裝修暫停營業，我已經去咗歷山大厦Cova。」Harvey Nichols 四樓係飲茶傾偈好地方，下午人少清靜，夥計服務好，傾密偈最啱，唔易俾人撞到，Cova就位於通道旁，人來人往，俾人影咗相都唔知。不過高人話冇有怕，佢都唔怕咯，左丁山有乜資格說不！
高人久享清福，剛在鄉村俱樂部食完輕便午飯，一開口就問左丁山對時事點睇，有乜辦法可以幫吓香港年輕人，為香港減困。嘩，咁大條題目，點講呀，唯有亂噏一輪，結論係梁振英上台後，整整兩代香港人，三十歲或以下嘅，大部分都變成反梁份子，又因反梁而遷怒於欽點佢嘅北京，變成反共，釀成本土自決思潮。一間著名九龍男校舉行開放日，學生竟然掛出直幡：「港族自決」，當然迅速俾學校拆除。中學啫噃，學生家長多數非富即貴，屬香港成功得益階層，學生竟然有此舉動，在其他無產階級中學，可能「自決」思潮更盛，而呢種思潮係梁振英上台後迅速傳開晒嘅。《環球時報》評論梁游，話要追尋深層原因，唔通有人又要賴美帝煽動咩？
高人慨嘆：「年青學生由出世嗰日起就無法改變命運，生出來就係中國種、中國人，生在香港呢塊中國土地，呢樣嘢無可改變，點解要花精神同呢個現實爭拗呢？我已經80歲，一生在香港得益甚多，現在見到香港分裂，老少分裂，心有戚戚然，想幫吓香港，幫吓香港下一代，希望香港繼續穩步向前。我有個構思，就係咁咁咁……你認為點呢？」老人家愛港心切，都無憂無慮咯，仲要找麻煩上身搞研究，寫報告，向最高領導陳情？左丁山年青時有個花名，俾老闆叫做Dr. No，鍾意駁嘴駁舌吖嘛，年紀大了亦生性不改，勸告高人無謂攞苦嚟辛，咁多年來，不少甚麼民間研究報告，寫出來之後，呈交政府，幾時見過有反應呀，咪全部係石沉大海，不見天日囉！討論一小時，老人家以往又係不服權威，有碗話碗嘅，卒之長嘆一聲：「罷了。」係囉，社會政治大事，留番俾政客去搞啦，我地去吓馬場，反為耳根清靜，講到馬就大家精神，佢話啱啱介紹咗一位內地大富豪搵新進練馬師買馬，希望冇介紹錯，左丁山就話「一片光明」復出，跑千二米，狀態甚佳，大勁敵係「紅衣醒神」，未必讓磅讓得起也。
上一則: 心力與運勢 - 陶傑
下一則: 中史讀甚麼 - 曾志豪
I
没有评论:
发表评论