開始爭入閘 - 左丁山
種種迹象顯示，葉劉淑儀如無意外，會在12月15日宣布參選特首。聽一啲消息人士講，葉劉為人不大善於隱藏個人喜惡，一早就想競選特首，理得佢前面是紅燈還是黃燈，一啲選委據講曾經好坦白咁同葉劉講：「最弊你有啲乞人憎呢！」葉劉嘅回應係：「有人更加犯眾憎啦。」葉劉有時係坦白得可愛嘅，為官行政經驗亦足夠，可惜稍缺人和，民意支持度不夠，商界選委較少同佢打交道，財金界尤其對佢認識不足。
曾俊華遇上紅燈喎！據講此乃擁梁派心戰室放出嘅消息，一啲擁梁派乘機大造文章，話曾俊華如果膽敢衝紅燈，就係與中央對着幹，後果堪虞。講咁多無非係想嚇走曾俊華嘅啫。在一個大學晚宴場合，左丁山特登問一位高級智囊：「北京有冇向曾俊華出示紅牌或紅燈嘅呢？」呢位高人答：「我唔知，但我知道中央唔會咁笨，講到出口。中央唔想你做嘅話，唔會事先講，只會到投票之時，向選委發出投票取向，等你攞唔夠票入閘。」左丁山懵懵地再問：「假如得到泛民選委支持，入到閘又點？」高人話：「咁就好弊，敵人支持的人就是中央的敵人，泛民反對的人，就是中央的朋友，泛民支持的參選人一定受到中央封殺，例如蘋果日報大力吹捧嘅人一定冇得入閘！曾俊華如果醒目就唔好主動向泛民拉票入閘。」
哦明白嘞，甚麼紅燈衝燈之話，全是心戰室攻勢，曾俊華做咁耐政府工，理應明白晒，所以佢講得愈來愈白，就係好有意思參選，梁錦松更加講明，如果曾俊華不敢參選，香港和諧無望，分裂更甚。
咁樣林鄭係唔係真係死咗心呀？「唔係噃。」另一位中環高人就向左丁山分析：「林鄭已變成朗尼，支高薪做大後備，必要時仍可出場。」講得白啲，中環高人話林鄭係Plan B，隨時替補（假設性）馬失前蹄嘅CY；林鄭近日公開演講，不忘向曾俊華放箭，既話財政司司長不熱衷支持扶貧，又讓香港GDP增長落後於新加坡，令人唔甘心。但財爺得財金界歡迎，二來佢嘅目前民意支持度遙遙領先，三來佢因職位關係，在世界上幾有知名度。不過中環高人話曾俊華之美國讀書工作背景及曾經入美國籍，慢慢會發酵成為「忠誠度問題」，被人放大，故意引導北京懷疑佢是否身在漢營心在曹。唔，呢一點好陰毒㗎，平時冇人講美國關係，你想做特首呀，就出現有心人刻意炒作之，尤其是特朗普與蔡英文通過電話㖭！（按語：梁振英昨日宣佈不參選）
上一則: 終於引火自焚 - 陶傑
下一則: 9個怪獸級投訴 - 曾志豪
I
没有评论:
发表评论