林鄭故宮計掂數 - 左丁山
在西九龍設立故宮博物館，好唔好？大方向係好嘅，故宮有珍貴文物無數，最有價值嘅一批，當然係中日戰爭時蔣介石下令入箱運往大後方，輾轉再在大陸全面赤化，國民政府退守台灣之時，運咗去台北嘅二十幾萬件珍品，現藏台北故宮博物館；因故宮遺物太多，現存於北京嘅，還有80萬件，其中當亦有國寶級、不能外借，餘下還有許多可以從中選擇，擺放在「西九故宮」，將來肯定能夠吸引遊客，吸引本地市民。從呢個角度睇，香港有「故宮博物館」，係大好事也。
點解文化界人士仲要嘈？因為處理方法程序唔啱香港文化吖嘛。秘密磋商，幕後拍板，害怕反對聲音而由西九管理局董事會通過就算！實際上董事局亦係傀儡，係林鄭加梁特兩人說了算，其他人只係橡皮圖章。喂喂，林鄭還未做特首，就用晒大陸嗰套行事作風，以後佢如果真的做了特首，咪潑辣過江青？
其實假如林鄭及其軍師、梁特等人能夠沿用西九十幾年來嘅諮詢方法，相信市民會樂於看到西九有一個故宮博物館，或者在其他地區設立個博物館嘅，駛乜咁鬼秘密吖。如此一來未經諮詢，音樂演唱演奏界就突然間冇咗一個演奏場館，以後世界級樂團仍然係被逼去澳門、台中、台北、上海開演奏會而避開香港，一個文化中心加一個老舊大會堂，早已不敷應用啦。啟德喎，五萬人體育場館只宜麥當娜開演唱會，張學友都未必敢去呀。西九音樂場館原以為係已定之物，只待開工，突然間俾林鄭吹一口氣就吹走咗，以前嘅諮詢一律作廢，林鄭點說得過去？
假如梁特與林鄭秘密決定在啟德興建故宮，相信反對聲音唔會好大，文化界人士實會歡迎㖭，啟德用地規劃，改變吓就得啦，將一啲原定私樓用地改變用途為「故宮」選址，頂多係減少私樓供應，抬高樓價，咁又有乜所謂啫，橫掂樓價都係升㗎啦！郵輪碼頭依家有大半年時間係廢物，將故宮興建在碼頭附近，唔駛諮詢都掂，兼且可帶旺大半荒廢咗嘅碼頭㖭。外國郵輪遊客可到博物館觀賞中國文物，直情係一流行程安排。恐怕係梁特一心要做地產發展特首，唔肯犧牲私樓用地，就選擇咗犧牲音樂文化界渴望已久嘅演奏館演唱館。林鄭係冇有怕嘅，因為所有文化界選委都係建制派，一定會緊跟指示投票選特首，而且文化界議員叫做馬逢國，所以林鄭夠膽我行我素，當文化音樂界嘅異數係傻仔傻女。
上一則: 英國人暗辱鄧公 - 陶傑
下一則: 在台北看煙花 - 林夕
I
没有评论:
发表评论