收藏家撐故宮 - 左丁山
呢日食完午飯，例牌行街，行過大道中萬年大廈周大福，見到地牢已經有咗一個新字號，就係HMV，原來嘅上海商業銀行已經搬回新總行大廈，心念一動，走落去行吓，䊹，有啲失望，同最初設於中建大廈嘅HMV相差好遠，即使比起不久前位於娛樂行嘅HMV亦有不如，希望佢係啱啱搬入新址，還有改善空間啦。
好快就行完間舖頭，到門口鬆人之際，遇到大才子董橋先生，相信佢亦係在附近吃過午飯順便落嚟行吓嘅。記得以前林奮強在UBS返工時，午飯後如有空閒時間喜歡到中建大廈HMV消磨十幾分鐘至半小時，碰上心頭好唱片影碟，就順手有照。但大家現在或已失去到HMV kill time嘅興趣了！
上到大道中，就遇到一位董橋先生亦認識嘅大收藏家，佢問左丁山對西九故宮有何意見，如實告之，收藏C嘆一口氣：「應該係大好事嚟嘅，我地收藏界一致支持，認為有故宮博物館，對香港係一件大好事，據我所知，內地主要省市爭取多年，皆不能成事，現在直情係中央政治局拍板送大禮俾香港，內地地方高官敢怨不敢言呀！」咁又點吖，香港人係咁麻煩嘅咯，送禮手法唔依正手續，收禮都唔高興。收藏C話：「我班人講古物唔講政治，所以撐西九故宮大聯盟有我地一份，但聲明只講收藏，不講政治，聯盟有啲人聲氣多多，涉及政治，其實應該收斂啲！」
古物收藏家支持西九故宮，無可厚非，只不過係各有立場啫，正如香港話劇團、管弦樂團、芭蕾舞團等演藝團體唔通會贊成西九故宮踢走演奏演藝館咩，如果梁特林鄭唔係急於求成，將故宮放在啟德（另一塊最多吉地曬太陽嘅地方），搞三個月公開諮詢嘅話，左丁山唔信香港會有強烈反對聲音，反而護航聲音會仲多。
點解要咁急？令人產生陰謀論，可能係梁特滿肚密圈之競選工程，原以為自己可以在競選連任時拋出嚟攞掌聲嘅，點知閘前墮馬，於是將件「功勞」過檔俾林鄭，幫林鄭樹立功績，誰知估計錯誤，現在反而成為林鄭一項負債！
收藏C收藏珍品無數，感嘆香港無地方可展覽，所有較大嘅地方都好難卜位，舉凡會展中心、五星酒店，以至九龍灣九展，皆長期旺場，開辦講座都有排期困難，將來西九故宮如有副館讓香港收藏家展出私人珍藏，相信有助於本港成為亞洲藝術hub。西九犧牲咗演藝界，收藏界無端端發達，佢地亦希望搞得好好睇睇也。
上一則: 活在夢中的梅姐 - 陶傑
下一則: 什麼人就有什麼粉絲 - 林夕
I
没有评论:
发表评论