身外物一場空 - 左丁山
沙田日馬散場，已近六點，移步去會所凱旋廳食飯，遇到地產信託投資（Reits）專家Y與家人，好似有司機接送，坐七人Van到門口，係咁意問一句：「司機都幾準時噃，計啱散場後十五分鐘到，停車場有位泊車，遲啲就爆滿嘅嘞。」專家Y話：「司機就係司機，不過唔係私家嘅，而係Uber司機。我家住九龍，一家人嚟凱旋廳食飯，要叫兩架的士，揸兩三架車嚟又驚冇位泊車，而且一樣嘢好緊要，自己唔揸車可以飲酒吖嘛！」係噃，專家Y計Reits投資價值，通常好準，估唔到坐的士都諗得精過人，佢話叫兩架的士一定貴過叫一架Uber七人Van，而且預計時間有揸拿，唔駛等車等太耐。俾佢點醒咗，下次左丁山一家人到山光道馬會吃飯，都可以考慮預約Uber嘅Van仔咯。
現時美國聯儲局講定2017年可能加息兩三次，啲Reits聞聲下跌，自高位回落，專家Y話投資Reits要睇長線股息，唔好俾基金單位價下調嚇怕咗，目前Reits回軟，已提供入市機會，亞太區Reits四大市場（澳洲、新加坡、日本、香港）喺2016年嘅回報，平均有十厘（增值加收息），幾穩定吖，起碼跑贏中港兩地股市指數，但要記住Reits永遠唔會爆升，只適合長線投資者。以左丁山愚見，退休人士長揸Reits收息，冇乜蝕底，既有穩定收息，又可抗通脹，只怕樓市大冧如2003年，各位可自行估計可承受風險。
會所熟人多，又碰到以前馬場常客，現已不再賭馬，專心向佛嘅收藏家C哥。C哥話讀多幾本佛學著作，雖未至看破紅塵，但已經看破若干世俗事，不再追逐古董名物。佢話有一次到摩羅街行古董舖，見到一件精緻賀禮物件，有齊上款下款，下款送禮人有三個名字，其中兩個係何善衡與伍宜孫。何伍兩人送禮，收禮人相信亦有番咁上下地位，但年代已久，C哥都唔記得係邊位咯，後人亦唔珍惜，故此物品流落摩羅街，可知傳承呢回事，有時係得過講字，如過眼雲煙而已。C哥嘅朋友太太有一門手藝，就係自製陶瓷公仔，漂亮異常，不時送俾親朋戚友，家有二百餘隻公仔，想話留番俾個女，但女兒話，千祈唔好俾我，我屋企冇地方擺。那麼朋友妻愛惜嘅百幾二百隻自製公仔相信最後都係去堆填區嘅咯。C哥話：「收埋咁多寶藏，到頭來又係一場空，最靚嘅珍品，最好就係送晒俾博物館！」
上一則: 你是個好人，但你快走吧 - 陶傑
下一則: 川普的擁躉 - 杜杜
I
没有评论:
发表评论