那怕店主惡？ - 李碧華
「店大欺客，客大欺店」乃常理。副刊報導了幾家「惡店」，如跑馬地蓮園粥粉麵店，中環九記牛腩店、勝香園番茄麵檔……老闆和老闆娘都惡死能登，聲又大人又爽直，即使罵客人，好寸嘴，但熟客還是喜歡被罵，否則冇癮──世上有些人愈鬧愈開心，別說身痕犯賤，而是有來有往又愛又恨，日子就這樣過去。如果老闆娘不記得他們口味，不理睬，忙得沒時間吹水呵責，有些熟客會悵然若失呢。難怪阿姐道：「人哋會覺得我哋好寸，唔使幫我哋平反。」
很多傳統小店開了幾十年，與街坊打成一片，除了人情味，還有是食物質素高，用料新鮮味道吸引，「好食」是主因，「唔好食」且被寸被罵？你還去？除非想媾老闆娘。
東區也有家客似雲來的金峰靚靚粥麵，得排隊。不過是傳統食物，但粥很綿，腸粉油條現做，熱辣辣上桌。老闆徐娘日日化行妝（搽眼影塗趾甲油的！）扮到鬼火咁靚，聲大夾惡，但生意旺盛。
財經版報導25年開24舖的海皇粥店，它歷史悠久一盤生意打出名堂，但近年水準下降，粥糊冇米，腸粉翻叮，好些食物「溫暖」而已，而且比人貴，有回魚片粥吃到小刺。我們情願光顧簡樸的傳統小店，那怕他們惡？可惜賣少見少。
Z88
没有评论:
发表评论