國泰換人 - 左丁山
美國網民惡搞二次創作，大力諷刺聯合航空，一啲連靚女講粗口都出埋，娛樂性十分豐富。一位朋友傳來一張廣告海報，大概網民創作，海報上有United標誌嘅飛機在雲層之上，附兩句文字： If we cannot beat our competitors, we beat our customer.（不能擊敗對手，就痛打乘客），圖片下面有廉航西南航空大字：We beat our competition. Not you.（我們專打對手不打你），如果廣告是真的，西南航空可謂抽水抽到水塘都乾晒。
肥仔K話以前住在加州，如果來往內陸，人人揀搭西南航空，要出境，先至會考慮聯航。聯航嘅聲譽其實冇乜，2002年破產重組，2005年又試過機師集體告病假，令3萬6千名乘客突然間滯留在機場冇人理，但聯航仍然賺錢噃，主要原因係美國航空業經過歷年競爭及不景氣，互相併購，只剩下四大航空公司，就係American，Delta，Southwest，United，四大公司控制絕大部份市場份額，乘客冇乜好揀，即使服務差如聯航，一樣生意不愁。
同亞洲中東航空公司相比，美國航空公司啲服務水平與食物質素可謂不入流，但不計國企雄霸市場嘅中國，亞洲航空市場仲係比較細，且競爭激烈，近十年又有廉航興起，傳統大公司都幾難做，譬如本港嘅國泰，呢幾年就夠愁眉苦面啦，上星期三（4月12日）國泰宣佈高層人事大改組，相信就係因要面對困境，重新整頓，希望挽回頹勢。
國泰前行政總裁朱國樑在4月10日還上新城財經台接受訪問，講國泰之燃油對沖虧損近85億元，並非經營失利嘅主因（外間普遍認為係），在2005年國泰同樣有巨大對沖損失，仍然賺錢，只不過2016年客運貨運收益全面下跌。港元匯率跟隨美元上升，故此令國泰業務大倒退。何解收益減少？咪就係競爭激烈，雖然國泰載客量在85%左右，高於市場平均，但乘搭頭等、商務艙之公司客減少，乘客量冇少到，總收入就下滑呢。朱國樑當時講未來國泰三年重整管理架構，不減少前線服務員工，但會裁減支援人員，講得頭頭是道，滿懷信心，想唔到兩日後就被調職去做太古中國主席，即係陳南祿離開太古集團之前嘅職位，有時人在江湖，身不由己，別人決定你的前途，莫奈何。新任國泰總裁Rupert Hogg，中文名叫做何杲，讀作「何稿」，不是「何呆」，杲字出自詩經衛風：「其雨其雨，杲杲出日」，烈日當空，陽光普照也！何杲難道就是未來國泰的太陽？個名就好嘞，睇吓是否叻過諸葛亮先。
I
没有评论:
发表评论