新 iPad未開售，收機職員唔知到時可以賺到幾多，所以未有太大興趣；反而落足嘴頭氹記者放售 iPad 2，賺快錢好過。
編輯室手記
舊 iPad仲吸引
2012年03月15日新 iPad今個禮拜五開賣，香港「有幸」入選首批發貨地區，炒家同排隊黨最開心。
記者上星期六上深圳華強北路賽博數碼廣場睇吓炒家點預備炒新 iPad。
點都估唔到收機職員見記者身上有 iPad 2，反應仲大，游說記者俾部機佢睇後，一邊驗屍咁驗，一邊打電話問「庄家」回收價；記者並無打算放機，但想拎番部機都唔易，足足同職員糾纏咗十幾分鐘先拎得番。而且不單只 iPhone、 iPad值錢，吹水時職員知道記者三年前買落 MacBook Pro，竟然連「古董」都唔放過，猛氹記者放機。傾落先知，其實收機職員不過賺庄家同放貨客之間一、二百蚊差價，所以新 iPad又好，其他舊機都好，一律照收，賺咗先算，唔會特別為新 iPad興奮。而且由於 Apple喺內地名氣大，所以內地人對所有 Apple產品都唔放過，回收價自然比其他品牌嘅同級產品睇高一線。
另外，新 iPad在大陸的放售價較在香港高幾百蚊，預計星期五開始會有唔少炒家親自帶貨衝關，記者有居住深圳嘅同事就話過關會 check得嚴咗，因為內地海關對入口電子產品會徵收 10%稅，以 16GB Wi-Fi版新 iPad計，大概要收三百蚊人仔稅。如果檢查時見你身上有 iPad，除非證明到部機自用，否則就要收稅。點先證明到？同事就話一定唔可以連盒過關，所以上年佢買 iPad 2返大陸時，都要將機同盒分兩日帶，認真麻煩。（周群雄）
收機職員話自己只是艇仔，回收價值幾多都要問「老細」，所以中途不停打電話問價，再暗中加番少少差價自己袋。
深圳華強北路有唔少電子商場，其中賽博專賣手提電話同平板電腦，回收價會較高，所以熟路人士都唔會嘥時間過隔籬賽格問價。
没有评论:
发表评论