隔牆有耳：桶酒殺入 Vinexpo 啱晒強國人
楊志達話內地人越飲越豪，貴一貴都有市場。
黎樹雄攝
兩年一度嘅 Vinexpo今日起一連三日喺會展舉行，有多達35個國家酒莊參展，係業界嘅大型盛事。咁具規模嘅酒展喺香港搞，梗係有原因，啱啱推出中國版嘅免費葡萄酒雜誌《 WINE.Luxe酒．派》做嘅調查顯示，港人無葡萄酒不歡，2千名受訪者中，59%每月花1至5千蚊買酒；花5千至3萬嘅都有成9%。
不過，高達90%受訪者就話，每月租賃酒窖花費少於1千蚊，總編輯蕭乃新都話花費相對算少，但查實存酒係好重要㗎；呢方面，內地似乎重視好多喎，否則中、法合資嘅內地酒莊王朝酒業，今年都唔會殺入 Vinexpo，作為「桶酒」嘅全國宣傳首站。財務總監及公司秘書楊志達話儲存桶酒，酒窖要好大同有適合溫濕度，內地先至有呢啲大酒窖。
王朝酒業今年 Vinexpo重點推介容量達300樽葡萄酒嘅桶酒。
一桶酒等如300支
話時話，強國人乜都要豪，飲酒都唔會執輸，所以「桶酒」最適合內地豪飲成風嘅市場，事關每桶有成300支酒量，酒莊可代客裝樽，每樽貼度身訂做標籤，最啱用嚟「晒命」。就連「酒桶」都用法國橡木造，釀製時令啲酒散發出泥土、辣椒等複雜嘅香味，強國人點會唔趨之若鶩？
王朝分別將2003、2005及2007年嘅葡萄酒，分做三批「桶酒」，平均每桶售13萬蚊。佢哋話內地一年飲成15億支葡萄酒，但75%係國產。但國產酒喺香港只算啱啱起步，因為上述調查話港人鍾意飲法國酒多啲，其次係意大利同澳洲。
王朝酒業今年 Vinexpo重點推介容量達300樽葡萄酒嘅桶酒。 
没有评论:
发表评论