王維基之香港電視出師未捷身先死，長使魔童淚滿襟，令人感嘆今日之特區政府，施政方寸大亂，進退失據，令香港回歸十六年來進入最烏卜卜時期，前朝老曾話要為電視等引入競爭，增發免費電視牌照，現在睇番轉頭，實在係鬧劇一場，好可能係曾特首未摸清北京底牌，就自把自為嘅箒，依家梁振英大概知道北京想乜，深思熟慮之下，體會領袖苦心，寧願冒險得罪絕大部份香港市民，只發兩個電視牌照，將王維基摒諸門外。
點解王維基不得阿爺歡心呢？猜測當然好多，左丁山就估一定係與政治考慮有關，電盈與有線電視之子公司攞到牌，對政府嚟講，好易話為箒，大家早有熱線，王維基則係布衣出身，雖說白手興家，投資數十億，但有幾多銀，早已亮了底牌，政府一眼睇晒，不似李吳兩家收收埋埋，深不可測也。
專欄界朋友，前壹仔編輯，梁振英競選誓師大會嘅司儀潘麗瓊在《頭條日報》專欄（十月十八日）則有見地，佢話：「答案不是『政治』而是『行政』，王維基是一介梟雄，他入亞視十二天便鬧得滿城風雨，和主席張永霖不歡而散。他與有線的吳光正和now的李澤楷等富二代不同，前者家族利益千絲萬縷，不會亂來的。要靠看主子『眉頭眼額』來做人，屈服於『潛規則』，不合王維基的『魔童』風格。他不獲發牌，一如肥佬黎在台灣不獲電視牌一樣，死因都是『難以駕馭』。雖然把他踢出局，會製造短期的政治動盪，總好比後患無窮好。」潘小姐被人劃為梁粉一族，佢嘅分析啱唔啱聽呀？
政治與行政如何劃分，有時糾纏不清，好難講，總之政府唔會將真正理由講出嚟，只會叫蘇錦樑講一千次「循序漸進」及向友好傳媒放風，例如話為了免費電視市場穩定，避免割喉競爭呢類廢話。周梁淑怡以前替林秀峰搞過「佳視」，執笠收場，試問對香港有何衝擊？答案係零，假若香港有五個免費電視台競爭而有一間執笠嘅話，對香港經濟有何影響？答案又係零！只有IQ零蛋嘅政府先至會用「市場衝擊」為藉口，只發兩個電視牌照。其實好早以前，政府拖得就拖之際，接近有線電視嘅消息人士已經傳出口風，如果有線攞到免費電視牌，可能會喊三聲，不知如何收科。有線本身已經難賺錢，畀個免費牌佢，即是害佢，若要投資十億八億嘅話，免不了供股集資，現在追入隻股票（1097），他日不要賴地硬至好。
发自我的 iPad
没有评论:
发表评论