http://hkm.appledaily.com/detail.php?guid=19077481&category_guid=15307&category=daily&issue=20150315
滙海探戈：等候耶倫發落 - 奇兵
各國面對經濟疲弱和通縮威脅夾擊，令減息潮好似病毒咁擴散，上周再蔓延至東南亞。泰國和南韓亦加入減息行列，加上美國加息預期有增無減，美滙指數上周終於破一百，創下十二年新高。
數數手指，今年短短兩個多月，全球已有二十四間央行減息，唔計二○○八年金融海嘯呢隻黑天鵝，家陣嘅情況其實極不尋常。試問一年前邊個估到環球低息玩咗六年幾後，各國今年又鬥減息。
回顧上周滙市，歐洲央行QE正式開車，區內孳息加速向下，令歐元跌勢雪上加霜，上周曾跌至1.0462美元，全周累跌3.2%，表現係五大中最弱。英倫銀行行長卡尼梅花間竹扮鷹鴿，上周出口術話幣值和通脹因素影響加息決定，令好友大失所望。英鎊上周失守1.5算，曾跌至1.4699的近五年低位，全周跌1.9%。日圓亦改寫七年低位，上周一度跌至一百二十二兌一美元。
歐元勢穿一算
聯儲局議息是焦點。根據劇情，儲局周三好可能會刪除耐心（patient）等待加息的會後聲明。六月加唔加息，美元本周能否更上層樓，得靠主席耶倫會後記招指點迷津。而利率期貨就估計，儲局九月加息的機會仍較大。歐元弱過藥煲，跌穿一算係遲早嘅事，問題係要衰幾耐。高盛和德銀就睇得幾淡，上周分別估計歐元九月和年底跌至一算，到二○一七年才見底，前者最低睇八十美仙，德銀就估八十五美仙。
奇兵
本欄逢周一刊出
上一則: 青心直說：資金去哪兒？ - 胡孟青
下一則: 焯焯有餘：I.T終於發威 - 關焯照
发自我的 iPhone
没有评论:
发表评论