http://hkm.appledaily.com/detail.php?guid=19209691&category_guid=15307&category=daily&issue=20150706
滙海探戈：中國式的鬧劇 - 奇兵
全球市場正處多事之秋，正當舉世聚焦希臘命途之際，內地股市近期卻越救越跌，搞到連阿爺亦驚惶失措，要搞甚麼暴力救市，當中包括21家券商被揼心口要集體托市，滬綜指4500點樓下唔准沽貨，變相搵佢哋笨要築起人造血肉城牆。今次A股大冧市，歸根究柢是阿爺自視過高，以為出動有形之手合大眾之力推高個市，產生嘅財富效應可以救埋個經濟，結果搞出個大頭佛。
滬綜指由去年2000位炒上逾5000水平，唔少後知後覺嘅大媽落叠後做晒蟹，再跌落去暴動都似，難怪阿爺近日為救市扭盡六壬。令人擔心水嘅係，雖然A股高位回吐逾三成，但水份仍然極高，家陣市場信心大失，除咗俾阿爺揼心口嗰啲，邊個會咁儍幫你頂。
中國股市幾年前衝上6000點後由盛轉衰，恐怕係近年政策連番失誤，令經濟奇蹟不再的寫照。當局不對症下藥撥亂反正，反而試圖以本末倒置方式令經濟妙手回春，結果炮製出一場中國式的鬧劇，家陣仲要賴外資搞搞陣，實屬貽笑大方。
希臘公投主導歐元
回頭說滙市，執筆時正值希臘公投，若支持接受債權人援助方案的勝出，該國可能要再次舉行大選，帶來不明朗因素，希臘經濟短期縱有動盪但債權人應會伸出援手，對歐元有利。相反要是公投結果反對接受債權人援助方案，希臘脫歐機會唔細，歐元短期恐怕要跌多一浸，下試1.08甚至1.05美元。
奇兵
本欄逢周一刊出
上一則: 青心直說：財技解決超支 - 胡孟青
下一則: 一周三件：銀河證券值博 - 錢雋
Z88
没有评论:
发表评论