2015年7月6日星期一

蘋果日報- 名人食誌：李兆基的杏仁茶

http://hkm.appledaily.com/detail.php?guid=19209918&category_guid=15307&category=daily&issue=20150706

名人食誌：李兆基的杏仁茶

誰說貪靚養顏係女士專利，87歲嘅老人家同樣可以鍾意皮膚白滑，恒基地產（012）主席李兆基（四叔）就係其中嘅佼佼者。大家都知中環國金軒係四叔嘅飯堂，原來佢每次食完飯，多數會食一碗生磨蛋白杏仁茶。

國金軒嘅蛋白杏仁茶每碗盛惠60元，雖然貴過市面唔少甜品店，但確實係啖啖杏仁滋味，而且口感細滑，食得出係經過多重隔渣過程。

■李兆基

據聞，國金軒係從美國採購材料，包括北杏、南杏同埋重膠質嘅龍王大杏，份量比重當然係秘密，亦係重點所在。舉個例，北杏主要取其香味，份量太多就會變苦。

廚房同事每朝將南北杏與龍王大杏嘅份量溝好，然後磨好隔渣，當有客人落單，先至即刻煲熱加糖，若客人要求冇糖，一樣可以做到，四叔就鍾意食中等甜味嘅杏仁茶。

以前聽過四叔呢位順德人鍾意食雙皮奶，估唔到杏仁茶先至係佢嘅至愛甜品。有時佢到外地巡視業務或出席活動，佢身邊嘅同事都會預先幫佢視察所到食肆有冇靚嘅杏仁茶，等佢老人家可以滋潤吓。咁滋陰，難怪四叔去到呢個年紀都仲咁精靈啦！

記者：高淑嫻