讀經濟 - 左丁山
上星期五寫澳門風雨，順便提及澳門金融管理局委員會主席陳守信（8月底上任）係浸大經濟系畢業生，一位浸大傳理學院畢業嘅老友問左丁山：「你識唔識陳守信，我想訪問呢位浸大校友。」可惜呢，唔識噃，只知道退休傳媒人C君認識陳守信，資料係佢提供嘅，據C君講，陳守信係1987年畢業生，在浸會學院時，受業於胡敦靄、曾澍基、鄧樹雄（系主任），因成績優異，後來入咗香港大學讀經濟學博士學位，師承饒餘慶。
咁就有啲關係嘞，當年浸會經濟系一科Money and Banking所用嘅教科書就係饒教授嘅大作，饒教授嘅港大得意門生，而呢位門生對饒老好尊敬嘅，咪就係前香港金管局總裁任志剛囉，現在任總貴為香港特別行政區政府行政會議成員，中環口痕友稱之為「超級財政司」，回復位高權重嘅good old days，澳門陳守信既與任總同為饒門弟子，不妨多多向任總大師兄請教。
上世紀80年代嘅浸會經濟系，教師陣容相當穩定，主力就係上述三位，前貿發局研究總監梁海國亦曾在浸會經濟系教過，鄧胡梁三人都係中大經濟系產品，曾澍基就係港大經濟系尖子，屬土生土長本地薑，而且係辣薑㖭。現任浸大經濟系教授係邊位呢？上網查閱，得知係鍾劍修教授，中大畢業，威斯康辛大學博士，睇研究著作就相當猛料，2000年已有論文在美國經濟評論（AER）發表，近年又有論文在英國權威刊物Economic Journal刊登；有好多教授寫論文寫足一世，都未必有論文在AER或EJ刊發也。
左丁山讀經濟系出身，成日以為經濟學在香港應受中學生歡迎，點知原來人老咗就有啲離地。一位新進經濟學教授向左丁山訴苦：「哎，依家中學生入到大學，未必揀讀經濟㗎。經濟系在中大屬社科院，在浸大科大屬商學院，在港大屬經濟金融學院，自有DSE後，潮流興學院收生，即學生入咗社科院商學院之後，二年班先至揀主修科，醒目仔女順應潮流，個個話要讀商科；社科院學生見到經濟學涉及微積分，醒目仔女都話要讀心理系新聞系社工系，經濟系變成兩頭唔到岸呀！」當今風氣係讀書為職業，向錢看，入商學院就讀金融，保險，環球企業，嫌經濟學過於理論化，唔實用。殊不知經濟學理論係商業經營策略之基石，金融投資方法亦脫胎於經濟學，做行政人員升級到CEO層次，唔識經濟大勢分析嘅話，只算係二流人才。有大志要做出色ibanker或大企業家，第一個學位讀經濟勝於讀環球企業。
I
没有评论:
发表评论