全城相士預測 邊個做特首
2012年02月25日
- 特首曾蔭權衰收尾，卸任在即被爆接受富豪款待搞到一身蟻，而新任特首將於下月 25日揭盅，選戰風雲一觸即發。唐英年、梁振英、民主黨主席何俊仁均已遞表參選成為特首候選人，新民黨主席葉劉淑儀亦磨掌擦掌爭取選委支持兼發表政綱，距離下周三閂閘只有幾天時間，老牌愛國份子曾鈺成仍未去馬，使選戰仍有變數。表面上有 5位候選人可供選擇，但講到尾，香港市民對特首戰亦只是有得睇無得揀。香港人未能掌握命運，求神問卜也未嘗不可，本報記者請 20位堪輿學家、相士和塔羅牌大師作出預測，當中民望勁插水的唐英年竟率先獲投 10票，有大多數支持者，梁振英有 4票，緊跟其後。
採訪：比華利、陳玉琼全城相士預測邊個做特首
曾鈺成
出生日期： 1947年 5月 17日（ 64歲）
生肖：豬 星座：金牛座
配偶：伍嘉敏
花名：太空成
學歷：香港大學數學系學士
是非：最近傳有人準備發放曾鈺成任職老師時的黑材料梁振英
出生日期： 1954年 8月 12日（ 57歲）
生肖：馬 星座：獅子座
配偶：唐青儀
花名：狼英
學歷：布里斯托理工估價及地產管理學位
是非：捲入西九未有申報利益衝突事件
＊獲 292個選委提名
梁振英
唐英年
唐英年
出生日期： 1952年 9月 6日（ 59歲）
生肖：龍 星座：處女座
配偶：郭妤淺
花名：龍豬
學歷：美國密西根大學心理學文學士
是非：最近捲入婚外情及僭建風波，民望插水
＊獲 378個選委提名葉劉淑儀
出生日期： 1950年 8月 24日（ 61歲）
生肖：虎 星座：處女座
配偶：葉文浩（已歿）
花名：掃把頭
學歷：美國史丹福大學管理碩士
是非：任保安局局長期間強行推行廿三條，促成 50萬人上街
葉劉淑儀
何俊仁
何俊仁
出生日期： 1951年 12月 1日（ 60歲）
生肖：兔 星座：人馬座
配偶：鄧淑儀
花名：鐵頭仁
學歷：香港大學法律系學士
是非：民望一直處於低位
＊獲 183個選委提名麥玲玲 心水特首：唐英年
「唐英年本身屬龍犯本命年刑太歲之象，代表有唔少衝擊，容易有是非口舌，可幸佢一生有長輩同貴人扶助，加上面相好有福氣，下巴開闊有力，代表一生福星高照，往往少勞多得。而唐生嘅太太，有一雙腰果眼，代表艱難環境中仍能樂觀面對，有幫夫之象。梁振英雖有越戰越勇之象，但面相太單薄，貴人運弱。」
麥玲玲
黎漢持
黎漢持 心水特首：曾鈺成
「如果曾鈺成有份入閘，一定係曾鈺成當選，今屆特首曾蔭權，嚟緊仲係姓曾世界，佢有呢個命，而且佢喺立法會咁耐，最了解政府運作，但就嫌佢瘦咗啲太削。何俊仁就最冇機會，樣唔夠霸氣。唐英年就恃住有後台撐腰，但佢下巴太窄，衰喺晚年，下巴唔夠氣勢。梁振英下巴有氣勢，但冇政治本錢，又眼大無神。」
李居明 心水特首：葉劉淑儀
「術數嚟睇，女人管治香港比較好，由英女皇時代開始已成定律，女人配合到香港，葉劉淑儀有霸氣，唔會有咁多是非，就算唐英年或梁振英當選特首，一定要搵葉劉做政務司，由佢管理公務員，壓得住啲投訴，而且經歷過 23條衰過，葉劉已經唔怕衰。」
李居明
李星瑭
李星瑭 心水特首：梁振英
「佢家個樣同幾年前真係變咗，梁生個下庭好靚，兩顴飽滿，佢嘅運走咗出嚟，呢啲係相由心生，一個人行善積福，面相同性格就會跟住改變，大家不妨對番梁生嘅舊相，佢個樣真係同以前分別好大。」
李丞責 心水特首：唐英年
「唐唐今年犯太歲，正好特首要為港人操勞效力，同時又受好多壓力，完全符合條件，過往好多政要如董建華同奧巴馬，佢哋當選都咁啱係自己生肖嗰年，所以犯太歲未必唔好。」
李丞責
林炳南
司徒法正 心水特首：唐英年
「我幫佢哋五人都起過卦，以唐英年嘅卦象係歸一數，換句話說佢打回原形，去番原來地方，所以唐生呼聲一定最高，加上唐生係馬形臉，呢種臉相未必做到一國之君，但登上地方首長冇問題。」
鍾應堂 心水特首：唐英年
「唐英年相好，有官相，額高飽滿，中央好信任佢，是非搞唔到佢，佢只係俾人整蠱。梁振英唔得嘅，額窄，冇官相。」
鍾應堂
區仲德
區仲德 心水特首：唐英年
「唐英年當官命，官架裏面有機會、有成就，但小人當道，口舌較多，但今年行月德貴人運，貴人高照， 99%必勝而回，成個命格睇嚟冇得輸。」
車婉婉（星座） 心水特首：梁振英
「梁振英屬獅子座，美國總統奧巴馬都係獅子座，獅子座嘅人有領導者風範。獅子座缺點係有時衝動，但領導人要考慮好多嘢，所以佢哋好需要團隊幫助，如果梁生有個好團隊，更加有優勢。」
車婉婉
吳佩孚
吳佩孚 心水特首：唐英年
「唐英年條命係王者之命，佢合主東方，比肩局，東方代表共產黨，比肩即兄，代表唐生背後有好大靠山，無肩不出，雖然佢呢排是非多，但一切唔受損，絕對唔影響佢稱王。」
林炳南 心水特首：唐英年
「唐英年係目字面相，主攻平穩，雖然佢係面臨風波，但一定會平穩度過。相對梁生係鷹鼻，佢鼻孔外露，會遇到好大風浪。唐生眼神又好夠定，佢生肖屬龍，今年犯太歲，但好快平息。」
林炳南
鄭智恒
鄭智恒 心水特首：梁振英
「梁振英行緊官星大運，唐英年只不過行緊財運，兩者比較兩位都係叻人，但唐英年健康比較差。曾鈺成就完全唔係材料，睇到佢本身有暗病，腎臟、前列腺同尿道、風濕關節有問題。」
陳天南 心水特首：唐英年
「唐英年係秋天出世嘅木，雖凋，但今年龍年行東方木盛氣局，好旺唐英年，助佢有做官氣勢，相對金旺需要火嘅梁振英，碰啱今年係水局，水抗拒火，氣勢減弱。」
轉姐（數字測運） 心水特首：唐英年
「唐英年號碼係 7，佢先破壞，後建設，今年幸運數字係 7，所以唐生成數最高，無論有幾多負面新聞，都係最佳人選。梁振英號碼係６，工作有權力，但太冷，一刀切。」
徐緣 心水特首：曾鈺成
「肖龍嘅唐英年五行屬木，本來好大機會，但併落五行屬火嘅曾鈺成，佢嘅火好旺，八運又行火，全部對手都唔夠佢嚟，佢真係要快啲報名參選。」
Jan Jan（塔羅牌） 心水特首：唐英年
「雖然唐英年好多負面新聞，暫時睇唔到有影響，仲睇到唐生後面有好大勢力，後台好大好大。不過，睇到唐生當選後，民怨四起，葉劉淑儀就一定唔得，背後有小人，而且幫她嘅人唔得力。」
楊志紅（塔羅牌） 心水特首：梁振英
「開咗牌局，梁振英嘅三張牌，過去一張係寶劍 9牌，代表佢過去要醒覺，家嘅一張牌係權杖牌，代表佢有權杖充滿生機，呢張牌完全顯示佢做特首嘅曙光，最後一張未來嘅牌雖然係死神，但千祈咪俾佢嚇窒，主要代表新舊交替，打破舊嘅先有新嘅輪迴。」
蘇民峰
「唔講啦，我家好少評論。」
楊天命
「唔係好方便回答。」
莫文蔚爸爸莫天賜
助手代為回覆：「莫 Uncle今年冇推算香港特首，亦唔打算推算。」
得票總計
＊訪問了 20名相士，其中 3人拒絕預測。
没有评论:
发表评论