【短片】【網民hot talk】梁振英賀年短片 網民：有破綻 係「交戲」
特首梁振英把手錶戴在手套外，網民認為做蘿蔔糕不應這樣戴錶。 (特首網誌圖片)
經典港產片《無間道》裏面嘅傻強(杜汶澤飾)講過：「如果一個人做緊一樣野嘅時候，好唔專心咁望住你，咁佢就係臥底啦！」原來唔單只做臥底需要精湛演技，做特首亦要識得交戲。
話說特首梁振英噚日發表網誌，話自己拍攝第二輯新年短片時，諗住走「寫實」路線，於是就同太太唐青儀喺志願機構嘅社區廚房一齊做蘿蔔糕，然後同社區中心一班「老友記」分享。事後梁振英形容拍攝過程非常輕鬆順利，因為佢唔使「交戲」咁話。
網民心裏就好疑惑，皆因短片拍攝過程明顯係早有安排，成班都係自己友，如果梁振英身處呢種環境下先至唔使「交戲」，咁佢平時面對議員或未經安排嘅公開活動，係咪全天候「交戲」呢？即係話佢對住巿民，或者遇到唔啱聽的說話，全程就會做戲，難怪講嘢冇句真。
雖然梁振英話影片要走「寫實」路線，但眼利嘅網民就認為有一個好大嘅破綻，原因係網誌內其中一幅相，好清楚睇到梁振英將黑色手錶戴咗喺手套外面，網民話整蘿蔔糕時，粘米粉一定會整污糟隻錶，根本唔應該咁戴錶，認為段片明顯係交戲。
正所謂真亦假時假亦真，到底梁振英幾時交戲，幾時唔使交戲？網民認為梁振英嘅演技已經達到「從內到外又從內到外」嘅境界，真係你估佢唔到。
【網民點睇】
Tong Desmond W K：好奇怪，如果以前肥彭做呢啲show，市民明知佢係扮嘢，但係見到都會高興，無話反感。但係換了CY做呢啲嘢，只會識得其反，越做越乞人憎。
Human Chan：戲假人更假
Steven Lam：由佢企起香港人面前開始已經做緊戲
Billy Wong：請求以後唔好再交任何戲，市民跟本唔鍾意睇你塲戲，擾民又傷財，我一見到你在電視上現，就立即mute咗佢，認真煩呀！
陳亦輝：做戲。煮嘢食就除錶啦，又唔包入膠手套裡面，隻錶又咁乾淨，又唔除錶，佢仲話一齊落手落腳煮食？大佬，蘿蔔榚用粘米粉架，少少風都一手都係啦。
柒柒Benny：佢師父係咪俄國戲劇理論大師史坦尼斯拉夫斯基？
Hoting Yip：無需要交戲，咁代表以前......梁匪振英，你落區時係交戲啦！
Derek Wong：今次唔駛交戲......即係之前交咗，之後又會繼續交囉......以佢咁鐘意逐隻字嚟玩
特首梁振英把手錶戴在手套外，網民認為做蘿蔔糕不應這樣戴錶。 (特首網誌圖片) 
没有评论:
发表评论