三段婚外情 - 左丁山
道貌岸然嘅著名經濟學家，前嶺南大學校長陳坤耀教授原來早有阿二，並且生下一名女兒，阿二就係佢嘅前女助理孫詠雅。呢啲私隱照計只有佢個人知道，況且陳校長退休後，已無公職，又無政敵，竟然都被人揭發私人婚外情之事，徒呼奈何，總之一日名人，一世都係名人，若有婚外情兼有結晶品，可以隨時被人揭發。陳校長太太陳芳琳又大方承認有此事噃，仲講到夫婦兩人所有財產，由孫詠雅女兒承繼，其他人仲想講乜？
此乃婚外情香港式，十分文明（可能有女讀者罵左丁山偏幫陳校長一腳踏兩船）。咩唔係呀，你睇吓，印度人力資源部次長塔魯爾有婚外情，搭上巴基斯坦女記者，太太（五十二歲）入侵佢嘅Twitter戶口（呢位部長鍾意玩Twitter，有一百萬追隨者），發現婚外情，揭發後，印度全國轟動，太太搬去五星級酒店暫住，上星期五就離奇死亡，身上多處傷痕，驗屍後確定死於「非自然因素」，但在酒店房發現屍體嘅塔魯爾立即領走遺體，星期六就火化之。
此乃婚外情印度式，十分恐怖，事有可疑，不過印度人當強姦女性為常事，婚外情何足稀奇。
第三單就係法國式，法國總統個個有婚外情，數不勝數，但整個法國社會，丈夫偷情，太太偷漢，乃是家常便飯，法國記者/新聞界從不視之為新聞，但自從IMF主席史特勞斯．簡在紐約發生召妓/性騷擾疑案後，美國傳媒窮追猛打，法國傳媒可能受到感染，前星期雜誌（Closer）狗仔隊跟蹤到總統奧朗德偷食女星，新聞一出，總統府人仰馬翻，總統同居女友激到食藥過度，入咗醫院，宣稱無意思執行李離開總統府愛麗舍宮，奧朗德不知如何是好，三角戀暫時陷於僵局，此事若發生在英語國家，總統幾難唔俾人民鬧個半死，但法國人仍然哈哈笑，若無其事，反正呢位總統，早已民望低落，不受歡迎嘅啦。
三段婚外情，港印法各有不同嘅處理方法，反映出民族性之不同。舊時中國男子若太太無所出，娶妾侍閒過立秋，今陳校長夫婦膝下無兒女，可能係舊俗啫。印度不知是否男權過大，女權不得伸張，太太死得莫名其妙。法國咯喎，男女交換「拍拿」，一場喜劇而已。不過即使係法國人，耐性都係有限度嘅，奧朗德呢位社會主義/劫富濟貧嘅總統，喺2012年競選時大聲講過：「我做總統會時刻行為檢點，為人民楷模！」呢句話係針對換妻總統薩爾科齊嘅，點知佢咪又係一樣偷食唔抹咀，隨時為自己製造悲劇！
发自我的 iPad
没有评论:
发表评论