�果日�- 田北俊以後逍� - 左丁山

田北俊以後逍遙 - 左丁山

田大少公開要求梁特首辭職，講完就被全國政協免職，唔怪得幾個星期前已有消息傳出，「反梁即是反中央」，反中央當然冇運行。田少嘅發言又係不合時宜嘅，前特首董先生在十月二十四日下午特登召開記者會，表面上係老人家苦勸學生回家去，不再佔領，實際訊息就係故意現身力挺梁振英。不可不知佢係全國政協副主席噃，有此身份，自然知道中央意圖，目前要力保CY維穩，除咗講俾香港市民聽之外，亦係講俾不同派系嘅親政府人士聽，暗示各派系要「團結在梁特首的身邊」。點知田大少就係唔俾面，董特首記者會之後，佢就對記者講，指梁振英無力管治香港，應該向中央請辭。


中央當然好唔高興，立即在周末行動，部署在星期一（十月二十七日）將踢走田少嘅建議擺入全國政協常委會議嘅議程，星期三（十月二十九日）就投票決議將田大少自全國政協委員除名，即係話：「你唔聽話吖嗱，立即兜巴冚。」夠晒幽默嘅係，另一位政協陳永棋代政協主席俞振聲傳話：「仍要團結田北俊，大家要做田北俊的工作。」


一位年青朋友不知何謂「做田北俊的工作」，走嚟問左丁山。哈哈，年紀大啲嘅人就會明白，此乃中共統戰招數，做××工作，就係不斷搵××嘅朋友、熟人同××維持關係，不時找××談話，一來游說佢「回到黨的路線來」，二來不斷趁接觸時，打聽佢嘅最新思想動向，睇吓佢有冇投向「敵營」嘅意圖，如果有，要立即匯報，由上頭決定是否清除此人，全面打擊佢。「團結××，做××的工作」，就係箍住唔俾佢脫離黨的視線及影響範圍咁解。田大少識得咁多人，一定有黨的忠實朋友做田大少工作嘅，搵田生飲飲食食，傾吓偈，呢啲工作算係優差吖。田大少話自己做慣老闆，唔想為太多老闆服務，一定唔會競選特首，講得十分老實，佢辭去自由黨黨魁後，話自己以後講說話更加自由，左丁山信㗎，睇埋佢嘅身體語言就知道佢為咗避免影響自由黨其他人嘅現實利益，口頭上要對中央臣服，其實心裏不服，仍然唔肯收回對梁振英之「不敬言論」。照計田家在1949年之交，盡失內地資產（共產黨沒收全國資本家財產），父親及時舉家遷港，東山再起，在香港仲發達過戰前，今天富甲一方，田家不欠北京分毫，以後少搞政治就唔需要睇北京老闆面色，田大少係有資格逍遙嘅啫。

HH