難開新戶口 - 左丁山
黃之鋒等人籌組新團體，要到匯豐開戶口，搞咗一輪，開唔成，黃之鋒上電台講匯豐有政治考慮。如果話完全冇，左丁山都唔信，但近來在銀行開新戶口，銀行諸多要求，確係事實，主要原因左丁山已經講過，係與KYC與AML有關，黃之鋒嘅新組織明顯會從事與政治有關嘅活動，會收各界捐款，任何銀行聽見就怕怕，捐款如來歷不明，最易涉及洗錢，有理冇理，銀行合規部門一定追問到底，令前線分行人員全無誘因接納呢類新客戶。黃之鋒係有名人物，今時今日，佢去邊間銀行都唔易開到新戶口。
匯豐因客戶洗黑錢事件，俾美國政府前後罰款19億美元，小股東為之喊得一句句。呢，4月2日彭博又有新聞，美國紐約東地區法院（即Brooklyn）委派嘅匯豐監控專員Michael Cherkasky寫嘅一份報告，向法庭提交，已成為公眾資料，報告檢討咗匯控（HSBC Holdings），在2015年實施反洗錢行動嘅執行狀況，指匯控雖然取得進展，但其「合規科技」（Compliance Technology）仍然有大量改進空間，未臻完善，匯控高層雖有決心努力清除所有洗黑錢戶口，但顯然進度不如理想，仍需努力。
美國法庭委任之人如此說，你話匯豐怎麼辦？從管理學常識嚟聽，唔駛花錢請麥肯錫做顧問都知，必定係（一）從嚴監控現有戶口，一有依郁或可疑之處，立即踢走，（二）新戶口如非來自大財團、大客戶、有頭有面人物，一於拒諸門外，費事麻煩。十零年前，黃之鋒之類人士或可以在匯豐開到戶口，今時今日，難以哉。
莫講話黃之鋒，就算係一帶一路國家地區之大富人家，如果冇足夠證據證明其財富來源，在香港開個戶口都好難。巴拿馬律師行啱啱被黑客入侵，盜取機密文件1100餘萬份，已落入記者傳媒手中，洩露出嚟嘅有錢有面人物，一定與世界級銀行（如匯豐）有來往，各國政府追查起嚟，豈止富戶周身蟻，連帶銀行都會忙個不休，隨時被捲入「協助逃稅」漩渦，分分鐘又受罰款不知幾多個億美元。在此大環境下，黃之鋒及其同路人俾全港銀行封殺，只能嘆一句生不逢時，佢地乘機抽水賴吓政治因素，亦人之常情，市民不必睇得太嚴重。反而在推動一帶一路甚麼「商機」方面，梁振英曾俊華即使嗌破喉嚨，本港銀行都唔會有積極反應，唔慌會主動爭取一帶一路新戶口。
上一則: 占士邦還是閻王？ - 陶傑
下一則: 廢 老 - 曾志豪
I
没有评论:
发表评论