2017年1月9日星期一

中環在線：黎姿股掛牌　隨時爆升 - 李華華

■黎姿旗下嘅卓珈主要做醫學美容，以CosMax品牌設兩間分店。　資料圖片

明星效應加埋創業板等於乜東東？咪就係爆升囉。黎姿（現名黎珈而）旗下醫學美容公司卓珈（8358）明日會喺創業板掛牌，觀乎上星期兩隻創業板新股都由一、兩毫招股價爆上去幾蚊，呢隻黎姿股應該輕易再創新股神話。

舊年隻「翠如BB股」聯旺（8217）熱鬧到今時今日，大家見到新股上市隨時有百億元市值，唔少公司都排住隊上市。

叔仔做執董唔收錢黎姿旗下嘅卓珈主要做醫學美容，以CosMax品牌喺中環、銅鑼灣各有一間分店。45歲嘅黎姿做主席兼行政總裁，叔仔馬庭偉（丈夫馬廷強細佬）免費做執行董事，負責公司資訊科技同業務發展。

根據招股書，51歲嘅馬庭偉1987年畢業於南加州大學，獲得電腦科學理學學士學位，佢有自己IT生意同投資，因家庭關係幫黎姿手，公司上市後唔會收取任何薪金，之前都冇收。

黎姿嘅年薪就有360萬元，不過都係嗰句，年薪只係細數，黎姿兩夫婦持有卓珈75%股份，公司上市後市值上升，佢兩位身家就會變成好多個億。

睇番招股書，黎姿呢間公司幾正路，過去兩年分別賺過千萬元，公司招股價6至8毫子，集資淨額約4,600萬元，主要想今年喺九龍開分店。

李華華

Z88